ممبئی(نیوز ڈیسک) بالی ووڈ اداکارہ کترینہ کیف نے اپنے کیریئر کی پہلی انٹرنیشنل فلم سائن کرلی ہے۔وہ چینی سپراسٹار جیکی چن کے ساتھ فلم ”کنگ فو یوگا“ میں کام کریں گی۔ ایکشن اورایڈونچرسے بھرپوراس فلم کی ہدایات ہانگ کانگ کے ہدایتکار سٹینلی ٹونگ دیں گے۔بھارتی میڈیا کے مطابق 31 سالہ اداکارہ جو ہانگ کانگ میں ہی پیدا ہوئی تھیں چین اور انڈیا کی مشترکہ فلم میں ایک چینی یونیورسٹی کی پروفیسر کا کردار نبھائیں گی جب کہ جیکی چن ماہر آثار قدیمہ کے رول میں ہوں گے جو مگدھا کے علاقے میں تحقیق کررہا ہوتا ہے۔جیکی چن جو مارشل آرٹ کے ماہر ہیں، فلم میں ایسے اسٹنٹس کا مظاہرہ کریں گے جو اس سے پہلے انھوں نے کبھی کسی فلم میں نہیں دکھائے جب کہ کترینہ کیف جو ”ایک تھا ٹائیگر“ اور ”بینگ بینگ“ میں ایکشن سین کرچکی ہیں، پہلی مرتبہ کسی انٹرنیشنل ہیرو کے ساتھ ایکشن میں نظر آئیں گی۔ اس سلسلہ میں رابطہ کرنے پر کترینہ کیف کے میڈیا ایڈوائزر نے تصدیق کرتے ہوئے کہا ہے کہ کترینہ کیف سے فلم ”کنگ فو یوگا“ کے لیے رابطہ کیا گیا ہے تاہم انھوں نے ابھی کام کرنے کا فیصلہ نہیں کیا۔واضح رہے کہ کچھ عرصہ قبل عامر خان کے جیکی چن کے ساتھ کام کرنے کی اطلاعات تھیں مگر انھوں نے وقت نہ ہونے کے باعث فلم کرنے کی حامی نہیں بھری جبکہ بھارتی میڈیا کے مطابق کترینہ کیف معروف ناول نگار چارلس ڈکنس کے ناول ”دی گریٹ ایکسپیکٹیشنز“ سے ماخوذ فلم ”فتور“ میں کام کر رہی ہیں۔