کراچی(نیوزڈیسک)بالی وڈ کے اے لسٹ اداکاروں سے سجی فلم ’دل دھڑکنے دو‘ پاکستان سمیت دنیا بھرمیں ریلیز ہوگئی۔ خوبصورت چہروں اور دلکش نظاروں سے سجی ’دل دھڑکنے دو‘ سال 2015ء کی ان گنی چنی فلموں میں سے ایک ہے جس کی ریلیز کا سب کو بے چینی سے انتظار تھا۔بلاک بسٹر فلم ’زندگی نہ ملے گی دوبارہ‘ کی ڈائریکٹر زویا اخترکی ڈائریکشن میں بنی ’دل دھڑکنے دو‘ کی کہانی میں امیروں کی زندگی کے ایسے رخ کو دکھانے کی کوشش کی گئی ہے جس میں بظاہر ’سب اچھا‘ ہوتے ہوئے بھی کچھ اچھا نہیں ہوتا۔کہانی دہلی کے امیر کبیر تاجر خاندان ’مہراز‘ کے گرد گھومتی ہے جو اپنے بزنس کو تباہی سے بچانے کے لئے غیرروایتی فیصلہ کرتے ہیں اور سرمایہ کاروں کو اپنی طرف متوجہ کرنے کے لئے دو ہفتوں کے کروز ٹرپ پر نکل جاتے ہیں۔ یہ سفر مہرہ خاندان کے زندگی کو دیکھنے کے زاویے کو کس طرح بدل دیتا ہے یہی اس کہانی کا نچوڑ ہے۔فلم کی ایک اورخاص بات یہ ہے کہ صف اول کے ہیرو رنویر سنگھ اور ہیروئن پریانکا چوپڑہ بھائی بہن کے روپ میں دکھائی دیں گے۔میڈیا نے فلم کے اوپننگ شوز کے بعد پبلک کے ریسپانس کو زبردست قرار دیتے ہوئے امید ظاہر کی ہے کہ ’دل دھڑکنے دو‘ بلاک بسٹر فلموں کی فہرست میں شامل ہونے میں دیر نہیں لگائے گی۔زویا اختر کی سوتیلی والدہ اور ورسٹائل ویٹرن ایکٹریس شبانہ اعظمی نے فلم کو ابتدائ میں ہی ملنے والی شاندار پذیرائی پر ٹوئٹر پرخوشی کا اظہارکیا۔فلم ’دل دھڑکنے دو‘ کی کاسٹ میں انیل کپور، شیفالی چھایا، رنویرسنگھ، انوشکا شرما، فرحان اختر، پریانکا چوپڑہ اور راہول بوس شامل ہیں۔’دل دھڑکنے دو‘ کا پاکستان میں میڈیا پارٹنر ’ہم ٹی وی نیٹ ورک ‘ ہے۔