اسلام آباد (نیوز ڈیسک)پشاور الیکٹرک سپلائی کمپنی (پیسکو) نے جمعہ کے روز دی جانے والی ہفتہ وار تعطیل ختم کرنے کا فیصلہ کر لیا ہے،
جس کا باضابطہ نوٹیفکیشن بھی جاری کر دیا گیا۔ جاری کردہ اعلامیے کے مطابق اب جمعہ کو پیسکو کے تمام مرکزی، علاقائی اور ذیلی دفاتر معمول کے سرکاری اوقات کے مطابق کام کریں گے۔ اس روز تمام افسران اور ملازمین کی حاضری بھی دیگر ورکنگ ڈیز کی طرح لازمی ہوگی اور دفتری سرگرمیاں بلا تعطل جاری رہیں گی۔
پیسکو انتظامیہ کا کہنا ہے کہ جمعہ کو باقاعدہ ورکنگ ڈے قرار دینے کا فیصلہ فوری طور پر نافذ کر دیا گیا ہے۔ اس سلسلے میں متعلقہ افسران کو ہدایات جاری کی گئی ہیں کہ نئے احکامات پر مکمل عملدرآمد یقینی بنایا جائے۔
انتظامیہ کے مطابق اس اقدام کا مقصد صارفین کو بہتر اور بروقت خدمات فراہم کرنا، دفتری امور میں تسلسل برقرار رکھنا اور عوامی شکایات کے فوری ازالے کو یقینی بنانا ہے۔
