کراچی (نیوز ڈیسک)دنیا بھر میں آج کل روزانہ ہی کوئی نہ کوئی اسمارٹ فون سامنے آتا رہتا ہے مگر کیا آپ ایسے موبائل کو خریدنا پسند کریں گے جسے آپ کسی کاغذ کی طرح موڑ کر جیب میں رکھ یں؟اگر ہاں تو ایسی اطلاعات سامنے آرہی ہیں کہ سام سنگ ایک فولڈ ایبل موبائل کی تیاری پر کام کررہی ہے۔اس حوالے سے مختلف ویب سائٹس میں اطلاعات سامنے آئی ہیں کہ جنوبی کورین کمپنی کی جانب سے کتاب کی طرح بند ہوجانے والے اسمارٹ فون کی تیاری پر کام ہورہا ہے جسے آئندہ سال متعارف کرایا جاسکتا ہے۔اس اسمارٹ فون کو فی الحال ‘ فولڈنگ ویلی’ کا نام دیا گیا ہے اور یہ ممکنہ طور پر اگلے سال جنوری میں فروخت کے لیے پیش کیا جاسکتا ہے۔افواہوں کے مطابق سام سنگ کے اس ماڈل کو چین میں آزمائشی مراحل سے گزارا جارہا ہے۔ایسے بھی سننے میں آیا ہے کہ اس ڈیوائس میں 3 جی بی ریم، مائیکرو ایس ڈی کارڈ سلاٹ اور فکس ہوجانے والی بیٹری ہوگی۔خیال رہے کہ سام سنگ کی جانب سے کچھ عرصے قبل ایک ٹیکنالوجی نمائش کے دوران ایسی لچکدار اسکرینیں پیش کی گئی تھیں جو مکمل طور پر فولڈ ہوسکتی تھیں اور اس نے 2016 میں فولڈ ایبل اسمارٹ فون بھی متعارف کرانے کا اعلان کیا تھا۔اس کا کہنا تھا کہ وہ ایسی ہائی ریزولوشن اسکرینز انتہائی پتلے پلاسٹک پر بنا رہی ہے جنھیں کسی کاغذ کی طرح موڑا جاسکے۔معروف کمپنی ایل جی کی جانب سے بھی ایسی مڑ جانے والی اسکرین پر مشتمل ٹی وی کی تیاری کا کام ہورہا ہے جسے وہ 2017 میں متعارف کرانا چاہتی ہے۔