نیویارک(نیوز ڈیسک)اگر آپ کی گاڑی کا گیٹ اورگھر کی کھڑکی کا شیشہ ٹی وی سکرین میں تبدیل ہو جائے تو آپ کیسا محسوس کریں گے۔ سام سنگ نے ٹیکنالوجی کو نئی جہت دینے کے عزم کا اظہار کرتے ہوئے اس مفروضے کو بھی ممکن بنانے کا اعلان کر دیا ہے۔ سام سنگ نے اعلان کیا ہے کہ وہ ایسی نئی ڈسپلے سکرین بنائے گا جو ہمارے شورومز میں رکھی اشیااور گاڑی کے شیشے سے باہر کے مناظر دیکھنے کے اندازہی تبدیل کر کے رکھ دے گی۔کمپنی کے حکام کا کہنا ہے کہ وہ جلد 55انچ کی ایسی اوایل ای ڈی سکرین متعارف کروانے جا رہے ہیں جو آپ کی کار کی کھڑکی کے شیشے کو سکرین میں تبدیل کر دے گی، دکاندار اگر اس سکرین کو اپنی دکان کی کھڑکی کے شیشے میں لگا لیں گے تو ان کے گاہک دکان کے باہر سے ہی اندر پڑی اشیاکاہر پہلو سے گھما کر بالکل اسی طرح معائنہ کر سکتے ہیں جیسے وہ ان کے ہاتھ میں ہوں۔گھر اور کارکی کھڑکیوں میں یہ سکرین نصب کرنے سے باہر کے مناظر کا تفصیلی مشاہدہ ممکن ہو سکے گا۔سکرین میں انٹیل رئیل سینس ٹیکنالوجی کا استعمال کیا گیا ہے جو 3ڈی کیمروں کے ساتھ منسلک ہے جو سکرین کی دوسری طرف دکان، کار کی کھڑی کے باہر کے مناظر کو سکرین پر لاتے ہیں۔ شفاف ڈسپلے کے ساتھ وائس کنٹرول فیچرز بھی اس میں بلٹ اِن ہیں اور مکمل ایچ ڈی ویڈیو پلے بیک کی سہولت اس کی کارکردگی کو چار چاند لگا دیتی ہے۔سام سنگ کے ان نئے اعلانات کے بعد ٹیکنالوجی ترقی کے اگلے مرحلے میں داخل ہو جائے گی۔