نیویارک (نیوزڈیسک )سماجی رابطے کی ویب سائٹ فیس بک اب وڈیوز کے معاملے میں گوگل کے یوٹیوب کو شکست دینے کے قریب پہنچ چکی ہے۔فیس بک کے ڈیٹا کے مطابق اس کے صارفین روزانہ سماجی رابطے کی اس سائٹ پر 4 ارب وڈیوز دیکھ رہے ہیں حالانکہ ستمبر 2014 میں یہ تعداد صرف ایک ارب تھی۔اور اس زبردست اضافے کے لیے جو اہم فیچرفیس بک کی جانب سے استعمال کیا جا رہاہے وہ درحقیقت ہیری پوٹر سیریز سے متاثر ہے۔یہ دلچسپ انکشاف فیس بک کے چیف پراڈکٹ آفیسر کرس کوس نے کیا۔انہوں نے ایک انٹرویو کے دوران کہا کہ ہماری ٹیم کو صارفین کی جانب سے وڈیوز پر کلک کرکے انہیں دیکھنے کے معاملے میں جدوجہد کا سامناتھا اور پھرایک دن ہمیں ہیری پوٹرسیریز میں دکھائے جانے والا اخباریاد آیا۔اس فلم کو دیکھنے والوں کو بھی یاد ہوگا کہ اس اخبار میں تصاویر کس طرح حرکت کرتی تھیں جو کہ کسی روایتی تصویر کی بجائے وڈیو ہی محسوس ہوتی تھیں۔فیس بک ٹیم نے اس سے متاثر ہوکر نیوزفیڈ پرایک نیا فیچر متعارف کرایا جسے آٹو پلے کا نام دیا گیا جس کے تحت وڈیوز اس وقت متحرک ہوجاتی ہیں جب آپ اسکرول کرتے ہوئے ان کے سامنے رکتے ہیں۔دسمبر 2013 میں آٹو پلے کوفیس بک نیوز فیڈ کا حصہ بنایا گیا اور اسکے بعد وڈیوز کے ویوز میں نمایاں اضافہ دیکھنے میں آیا اور اب وہ یوٹیوب کے لیے حقیقی خطرہ بن چکا ہے۔