لندن(نیوزڈیسک)اگر آپ نے کبھی جہاز میں سفر کیا ہو اور آپ کھڑکی کی جانب بیٹھے ہوں تو آپ کو کھڑکی کی تہہ میں شیشے میں ایک ننھا سا سوراخ نظر آئے گا۔لیکن اس سوراخ کا مقصد کسی عام مسافر کو کم ہی معلوم ہوتا ہے۔ایک ماہر پائلٹ نے اس راز سے پردہ اٹھاتے ہوئے بتایا ہے کہ یہ سوراخ انتہائی اہم چیز ہے جو کہ جہاز کے اندر ہوا کے دباﺅ میں اہم کردار ادا کرتا ہے۔ ماہر پائلٹ کا کہنا ہے کہ اگر آپ کھڑکی کو بغور دیکھیں تو اس میں آپ کو تین شیشوں کی تہیں نظر آئیں گی جبکہ درمیان والے شیشے میں ایک ننھا سے سوراخ دیکھنے کو ملے گا۔جب جہاز پرواز بھرتا ہے تو جہاز کے باہر ہوا کا دباﺅتیزی سے کم ہوتا ہے اور ایسا ہی جہاز کے اندر بھی ہوتا ہے لیکن جہاز کا سسٹم اس دباﺅ کو اس حد تک رکھتا ہے کہ مسافروں کو بالکل بھی دقت پیش نہ آئے اور وہ بآسانی سانس لے سکیں۔یعنی جہاز کے اندر اور باہر ہوا کے دباﺅ میں بہت فرق ہوگا۔اگر بدقسمتی سے باہر والا شیشہ کام کرنا چھوڑ دے تو جہاز کے اندر ہوا کا پریشر خراب ہوسکتا ہے لیکن اس سوراخ کی وجہ سے ایسا نہیں ہوتا۔ماہر پائلٹ کا کہنا ہے کہ ایسا ہونے کا بہت کم چانس ہے کہ باہر والا شیشہ کام کرنا چھوڑدے لیکن ایسی صورت میں درمیان والے شیشے میں موجود سوراخ اپنا کام شروع کردیتا ہے اور باہر کی ہوا آہستہ آہستہ جہاز میں داخل ہوتی ہے لیکن یہ خطرناک نہیں ہوتا اور جہاز کا سسٹم بآسانی اس دباﺅ کو کنٹرول کرلیتا ہے۔