اسلام آباد (نیوز ڈیسک ) ناسا نے اعلان کیا ہے کہ اس کے تین خلابازوں کی واپسی ملتوی کی گئی ہے۔ تینوں خلابازوں کو شیڈول کے مطابق 14مئی کو واپس آنا تھا تاہم اب ان کے بین الاقوامی خلائی سٹیشن پر موجودگی کی مدت میں اضافہ کردیا گیا ہے۔ تینوں خلا باز ناسا، یورپیئن سپیس ایجنسی اور روسی خلائی ایجنسی کے مشترکہ تعاون سے چلنے والے منصوبے کے تحت خلائی سٹیشن میں موجود تھے۔ خلائی مشن کے التوا کی وجہ روسی منصوبے کی ناکامی تھی۔ اس منصوبے میں کنٹرولرزخلائی گاڑی سے رابطے میں ناکام ہوگئے تھے جس کے بعد یہ خلائی گاڑی 7مئی کو زمین کی فضا میں تباہی سے دوچار ہوگئی تھی۔ امکان ہے کہ یہ انجینیئرز22مئی کوتازہ ترین صورتحال سے مطلع کریں گے۔ ناساکے مطابق اب ان خلائی انجینیئرز کی واپسی جون کے ابتدائی حصے میں ہوگی جس کے بعد جولائی میں دیگر تین انجینیئرز خلائی مشن پر روانہ کئے جائیں گے۔ ان انجنیئرز کی روانگی کے ہمراہ ہی پروگریس سکسٹی بھی لانچ کیا جائے گا۔