اسلام آباد (نیوز ڈیسک) اعلیٰ ثانوی تعلیمی بورڈ کراچی نے پری انجینئرنگ گروپ کے بارہویں جماعت کے سالانہ امتحانات 2026 کے نتائج جاری کردیئے ہیں۔
امتحانات میں تین طلبہ نے یکساں طور پر 1006 نمبر حاصل کرکے پہلی پوزیشن اپنے نام کرلی۔بورڈ حکام کے مطابق پری انجینئرنگ گروپ میں پہلی پوزیشن آدم جی گورنمنٹ سائنس کالج کے محمد سعد عادل اور عبداللہ جمال جبکہ بحریہ کالج کارساز کی عائشہ راشد نے حاصل کی۔ تینوں امیدواروں نے مجموعی طور پر 1100 میں سے 1006 نمبر حاصل کیے اور اے ون گریڈ حاصل کیا۔دوسری اور تیسری پوزیشننتائج میں محمد احمد رضا نے 1005 نمبر حاصل کرکے دوسری پوزیشن حاصل کی۔ وہ بھی آدم جی گورنمنٹ سائنس کالج سے تعلق رکھتے ہیں اور انہیں اے ون گریڈ دیا گیا ہے۔تیسری پوزیشن بھی دو امیدواروں کے درمیان مشترکہ رہی۔
دہلی گورنمنٹ کالج کے حافظ عبدالرافع طارق اور آدم جی گورنمنٹ سائنس کالج کے انس جاوید نے 1004، 1004 نمبر حاصل کیے۔پری انجینئرنگ گروپ کے نتائج میں آدم جی گورنمنٹ سائنس کالج کی مجموعی کارکردگی نمایاں رہی، جہاں اس کے چار طلبہ نے پہلی تین پوزیشنوں میں جگہ بنائی۔کامیابی کا مجموعی تناسب 55.08 فیصدناظم امتحانات زرینہ راشد کے مطابق پری انجینئرنگ گروپ میں 18 ہزار 464 امیدواروں نے رجسٹریشن کرائی تھی، جبکہ 18 ہزار 14 طلبہ امتحانات میں شریک ہوئے۔ان میں سے 9 ہزار 922 امیدوار کامیاب قرار پائے اور کامیابی کی مجموعی شرح 55.08 فیصد رہی۔گریڈز کے لحاظ سے 980 امیدواروں نے اے ون، 1781 نے اے، 2198 نے بی، 2659 نے سی اور 2029 امیدواروں نے ڈی گریڈ حاصل کیا۔ 216 امیدوار ای گریڈ میں کامیاب ہوئے، جبکہ 59 امیدوار پاس قرار پائے۔نتائج آن لائن بھی دستیابکراچی انٹر بورڈ نے پری انجینئرنگ گروپ کے نتائج اپنی ویب سائٹ پر جاری کردیئے ہیں۔ طلبہ اپنے نتائج بورڈ کی آفیشل اینڈرائیڈ ایپ BIEK کے ذریعے بھی چیک کرسکتے ہیں، جو گوگل پلے اسٹور پر دستیاب ہے۔
