اسلام آباد (نیوز ڈ یسک ) گوجرانوالہ کے مختلف علاقوں میں پولیس کے ساتھ ہونے والے دو الگ الگ مبینہ مقابلوں کے دوران ایک ملزم ہلاک جبکہ ایک کو زخمی حالت میں گرفتار کرلیا گیا۔

پولیس کے مطابق تھانہ لدھیوالہ وڑائچ کی حدود میں ناکہ بندی کے دوران مشتبہ افراد نے پولیس پر فائرنگ کردی۔ جوابی کارروائی کے دوران ملزمان کی اپنی ہی فائرنگ سے ایک شخص ہلاک ہوگیا، جبکہ اس کے دو ساتھی موقع سے فرار ہونے میں کامیاب ہوگئے۔پولیس کا کہنا ہے کہ ہلاک ہونے والا ملزم اپنی کم عمر بھانجی کو مبینہ طور پر متعدد مرتبہ زیادتی کا نشانہ بنانے کے مقدمے میں مطلوب تھا۔ کارروائی کے بعد ملزم کے قبضے سے 30 بور پستول بھی برآمد کیا گیا۔دوسری جانب تھانہ کوتوالی پولیس نے کارروائی کرتے ہوئے منشیات کے مختلف مقدمات میں مطلوب ملزم ثاقب کو زخمی حالت میں گرفتار کرلیا۔ پولیس کے مطابق چھاپے کے دوران ملزم نے گرفتاری سے بچنے کے لیے فرار ہونے کی کوشش کی، تاہم اسے زخمی حالت میں قابو کرلیا گیا اور اس کے قبضے سے منشیات بھی برآمد ہوئی۔

پولیس حکام کے مطابق فرار ہونے والے ملزمان کی گرفتاری کے لیے ایس ڈی پی او قلعہ دیدار سنگھ کی نگرانی میں خصوصی ٹیمیں تشکیل دے دی گئی ہیں، جبکہ شہر کے مختلف مقامات پر ناکہ بندی اور سرچ آپریشن جاری ہے۔سی پی او ڈاکٹر سردار غیاث گل خان نے کہا کہ معاشرے میں امن و امان خراب کرنے والے عناصر کے خلاف پولیس کی کارروائیاں بلاامتیاز جاری رہیں گی۔