اسلام آباد (این این آئی) چیئرمین پیپلز پارٹی بلاول بھٹو نے چیئرمین پی ٹی آئی بیرسٹر گوہر کو عمران خان سے ملاقات کی یقین دہانی کروادی۔جمعہ کو چیئرمین پیپلز پارٹی بلاول بھٹو نے مولانا فضل الرحمن اور بیرسٹر گوہر سے ملاقات کی ۔اس موقع پر پی ٹی آئی رہنماء اسد قیصر نے بلاول بھٹو سے کہا کہ آپ جمہوریت کے دعویدار ہیں، ہمیں آپ سے بہت توقعات ہیں۔

ذرائع کے مطابق ملاقات میں بلاول بھٹو نے بیرسٹر گوہر کو یقین دہانی کرواتے ہوئے کہا کہ (آج) ہفتہ کو آپ کی بانی پی ٹی آئی سے ملاقات کا انتظام کرتا ہوں، آپ جائیں اور بانی پی ٹی آئی سے حتمی مسودے پر مشاورت کریں۔ذرائع کے مطابق پی ٹی آئی نے بانی عمران خان سے حتمی آئینی ترمیمی مسودے پرمشاورت کیلئے 4رکنی کمیٹی بنا دی ہے جس میں بیرسٹر گوہر، سلمان اکرم راجہ، علی ظفر اور حامد خان شامل ہیں۔کمیٹی بانی پی ٹی آئی کو آئینی ترمیمی بل پر بریفنگ دے گی۔ ذرائع کے مطابق ملاقات کرنے والوں میں اسد قیصر بھی شامل ہوں گے۔