لاہور ( این این آئی) وزیراعلیٰ پنجاب مریم نواز شریف نے پاکستان کی تاریخ میں پہلی مرتبہ 5ہائبرڈ ڈبل ڈیکر بسوں کاباضابط افتتاح کر دیا۔وزیراعلیٰ پنجاب مریم نواز نے ہائبرڈ ڈبل ڈیکر بس کا معائنہ کیا اور ڈبل ڈیکر بس میں سفر بھی کیا، حکام کی جانب سے وزیراعلی مریم نواز کو ہائبرڈ ڈبل ڈیکر بس سے متعلق بریفنگ دی گئی۔

بریفنگ میں بتایا گیا کہ لاہور میں ڈبل ڈیکر بس سروس کا آغاز نومبر 2015میں سابق وزیراعلی پنجاب شہباز شریف کے دور میں ہوا، سیاحتی بسوں میں اکیڈیمیا، سفارتکار، سٹیٹ گیسٹ، کارپوریٹ سیکٹر، شوبز شخصیات اور عوام سیاحتی مقامات کی سیر کرتے ہیں۔وزیراعلی کو بریفنگ میں مزید بتایا گیا کہ لاہور میں سیاحت کے لیے نئے روٹس پر 3نئی ہائبرڈ ڈبل ڈیکر بسیں چلائی جائیں گی، بہاولپور اور راولپنڈی میں بھی ایک ایک ڈبل ڈیکر بس کا ا ضافہ کیا جائے گا، ملتان اور فیصل آباد میں بھی سیاحت کے لئے ڈبل ڈیکر بس سروس شروع ہوگی۔

اس موقع پر گفتگو کرتے ہوئے وزیراعلی پنجاب مریم نواز کا کہنا تھا کہ پنجاب بھر میں میٹروپولیٹن ٹورازم کیلئے مزید نئی ،جدید اور ماحول دوست بسیں فراہم کریں گے۔سینیٹر پرویز رشید ، سینئر صوبائی وزیر مریم اورنگزیب، وزیر اطلاعات و ثقافت عظمی بخاری، معاون خصوصی راشد نصر اللہ، ایم پی اے ثانیہ عاشق، چیف سیکرٹری اور دیگر بھی اس موقع پر موجود تھے۔