لاہور( این این آئی)صوبائی دار الحکومت لاہور میں آندھی، گرج چمک کے ساتھ بارش کے باعث ہر طرف جل تھل ہو گیا، مختلف علاقوں میں موسلادھار بارش اور ژالہ باری کے باعث فلائٹس بھی متاثر ہو گئیں، پروازوں کا رخ اسلام آباد کی جانب موڑ دیا گیا، بارش سے نشیبی علاقے زیر آب آ گئے جبکہ بجلی کا ترسیلی نظام بھی بری طرح متاثر ہوا ۔بارش سے ٹھوکر نیاز بیگ، واپڈا ٹائون، ویلنشیاء ، سمن آباد ، گلبرگ، فیصل ٹان، جوہر ٹائون، گلشن راوی ،اسلامپورہ ،شملہ پہاڑی، مال روڈ، جیل روڈ، لکشمی، گڑھی شاہو، کاہنہ اور اس کے گرد و نواح میں بھی موسلادھار بارش ہوئی جبکہ گجومتہ میں ژالہ باری سے موسم خوشگوار ہو گیا۔

موسلادھار بارش کے باعث لاہور لینڈ ہونے والی مختلف پروازوں کا رخ اسلام آباد کی جانب موڑ دیا گیا، پی آئی اے کی ریاض سے لاہور آنے والی پرواز 726 کو اسلام آباد لینڈ کروایا گیا۔اس کے علاوہ سعودی ایئر کی ریاض سے لاہور آنے والی پرواز ایس وی 736 بھی لاہور کی فضا میں موجود رہی، پائلٹ طیارے کو خراب موسم کے باعث 36 ہزار فٹ کی بلندی پر لے گیا، 30 منٹ ہوا میں رہنے کے بعد کنٹرول ٹاور کی ہدایت پر طیارہ لاہور ایئر پورٹ پر لینڈ کر گیا۔محکمہ موسمیات کی رپورٹ کے مطابق جیل روڈ پر 6، ایئر پورٹ پر 10.6، گلبرگ میں 6 اور لکشمی چوک میں 7 ملی میٹر بارش ریکارڈ کی گئی۔

اپرمال میں 6 ، مغلپورہ 7.5 ، تاجپورہ 5 ، نشتر ٹان میں 8 ، چوک ناخدا میں 3 اور پانی والا تالاب میں 6 ملی میٹر بارش ریکارڈ ہوئی۔رپورٹ کے مطابق فرخ آباد میں 1 ، گلشن راوی 5 ، اقبال ٹان 12 ، سمن آباد 9، جوہر ٹان 14 اور قرطبہ چوک میں 3 ملی میٹر بارش ریکارڈ کی گئی۔صوبائی دارالحکومت لاہور سمیت پنجاب کے مختلف علاقوں میں موسلا دھار بارش کے بعد پی ڈی ایم اے نے الرٹ جاری کردیا ۔

ڈی جی پی ڈی ایم اے عرفان علی کاٹھیا کی صوبہ بھر کے ڈپٹی کمشنرز کو الرٹ رہنے کی ہدایت کرتے ہوئے کہا کہ ہنگامی صورتحال سے نمٹنے کے لیے متعلقہ محکمے الرٹ رہیں۔ صوبائی کنٹرول روم سمیت تمام اضلاع کے ڈسٹرکٹ ایمرجنسی آپریشن سنٹرز کو بھی الرٹ کر دیا گیا ہے۔پی ڈی ایم اے کنٹرول روم میں صورتحال کی مانیٹرنگ 24/7 جاری ہے۔ 1122 سمیت دیگر ریسکیو ادارے مشینری سمیت عملے کو الرٹ رکھیں۔ ترجمان پی ڈی ایم اے کے مطابق بارشوں کا سلسلہ 29 اپریل تک جاری رہنے کے امکانات ہیں۔