گوجرانوالہ (این این آئی)گوجرانوالہ میں ڈاکوئوں نے نائٹ گشت کرنے والی پولیس وین کو لوٹ لیا، ڈاکو پولیس اہلکاروں سے نقدی کے ساتھ سرکاری اسلحہ بھی چھین کر فرار ہو گئے۔پولیس نے لٹنے والے سب انسپکٹر شوکت علی کی مدعیت میں تھانہ نوشہرہ ورکاں میں واقعہ کا مقدمہ درج کر لیا ۔
سب انسپکٹر شوکت علی کے مطابق تھانہ کوٹ لدھا کی پولیس وین نائٹ گشت پر تھی، تھابل دوچھا کے قریب سڑک پر دو ڈمپر ایسے کھڑے تھے جیسے کوئی ایکسیڈنٹ ہوا ہو۔ڈمپروں کو دیکھ کر پولیس وین روکی تو اچانک تین مسلح ڈاکو سامنے آ گئے اور اسلحہ تان لیا، ڈاکوئوں نے وہاں موجود دو راہگیروں سے بھی لوٹ مار کی اور فرار ہو گئے۔پولیس کے مطابق واقعہ جمعے کی رات پیش آیا تھا، تحقیقات جاری ہیں ملزمان کو جلد گرفتار کر لیا جائے گا۔
