اسلام آباد (آن لائن)وزیر داخلہ شیخ رشید احمد نے وفاقی پولیس کے ساتھ ساتھ ایف آئی اے میں بھی بڑے پیمانے پر آپریشن کلین کی تیاری مکمل کرلی ہے،ایف آئی اے کے افسران کی اجارہ داری ختم کرنے کے لئے روٹیشن پالیسی کو حتمی شکل دیدی گئی ،دس سال سے ایک ہی سٹیشن پر کام کرنے والے افسران کو صوبہ بدر
کر دیا جائیگا ۔وزارت داخلہ کے مصدقہ ذرائع کا کہنا ہے کہ وزیر داخلہ شیخ رشید کی ہدایت پر ایف آئی اے کے ملک بھر میں کام کرنے والے ڈائریکٹرز اسسٹنٹ ڈائریکٹرز،انسپکٹرز،سب انسپکٹرز،اسسٹنٹ سب انسپکٹرز اور محرر محضرات کی فہرستیں تیار کی گئی ہیں ،ان میں جو افسران یا اہلکار عرصہ دس سال سے ایک ہی اسٹیشن یا ائیر پورٹ یا تھانے میں تعینات ہیں انہیں صوبہ بدر کر دیا جائیگا اور جو افسران واہلکار پانچ سال سے ایک سٹیشن پر براجمان ہیں انہیں شہر بدر کرنے کا فیصلہ کیا گیا ہے ۔ذمہ دار ذرائع کا کہنا ہے کہ وزیر داخلہ شیخ رشید احمد کی ہدایت پر ایف آئی اے میں موجود کالی بھیڑوں کی الگ سے فہرستیں مرتب کی جارہی ہیں اور انتہائی باریک بینی سے ان کے ناجائز اثاثوں کی جانچ پڑتال کی جارہی ہے اور یہ فہرستیں نیب کے حوالے کی جائیں گی۔ذرائع کے مطابق روٹیشن پالیسی کا نفاذ چند روز میں متوقع ہے ۔دریں اثناء وزیر داخلہ کے حکم پر وفاقی پولیس کے انسپکٹروں اور سب انسپکٹروں اور اسسٹنٹ سب انسپکٹروں کے اثاثہ جات اور ان کے خلاف انکوائریوں کی پڑتال بھی جاری ہے۔
