اسلام آباد (این این آئی)معروف سائنسدان ڈاکٹرثمرمبارک مند نے نوازشریف کا ریورس انجینئرنگ کا دعویٰ مسترد کردیا۔ نجی ٹی وی کے مطابق معروف سائنسدان ڈاکٹرثمرمبارک مند نے سابق وزیراعظم نواز شریف کا ریورس انجینئرنگ کادعویٰ مستردکرتے ہوئے کہا کہ
امریکی میزائل ٹوماہاک کی ریورس انجینئرنگ کا دعویٰ درست نہیں، نواز شریف کے ریورس انجینئرنگ کے دعوے سے اتفاق نہیں کرتا۔معروف ایٹمی سائنسدان نے کہا کہ ریورس انجینئرنگ کا میزائل نہایت نازک ہوتا ہے، مضحکہ خیز ہے کہ میزائل گرے اوراس کے ٹکڑے نہ ہوں، یہ سچ ہے علاقے سے میزائل ملے مگر وہ چند ٹکڑے تھے۔ڈاکٹرثمرمبارک مند نے کہا کہ تباہ شدہ ملبے اور چھوٹے ٹکڑوں پر کیا ریسرچ کی جا سکتی ہے؟ پاکستان سے امریکا نے یہ ملبہ واپس مانگا بھی نہیں تھا تاہم ہمارے پاس امریکا کی ایسی کوئی درخواست آئی ہی نہیں تھی۔انہوںنے کہاکہ یہ تو محض کوڑے کرکٹ کا ڈھیر تھا جو بے سود تھا، امریکا ملبہ مانگتا تو واپس بھی کردیتے۔
