لاہور (آن لائن) بورڈ آف انٹرمیڈیٹ اینڈ سیکنڈری ایجوکیشن لاہور کے زیر اہتمام ہونے والے میٹرک کے امتحانات کے نتائج کا اعلان کردیا گیا ہے۔ لاہور بورڈ کی جانب سے کئے جانے والے اعلان کے موقع پر نتائج کے حوالے سے کوئی تقریب منعقد نہیں کی گئی۔
جبکہ تمام نتائج کو بورڈ کی ویب سائٹ پر آن لائن کردیا گیا ہے۔ نمایاں نمبر حاصل کرنے والے طلباء و طالبات کو پوزیشن دینے کی بجائے گریڈ دیا گیا ہے۔ جو اے، بی اور سی کیٹاگری کے گریڈ پر مشتمل ہے، نتائج کے اعلان کے ساتھ ہی سینکڑوں بلکہ لاکھوں طلباء نے اپنے نتائج آن لائن چیک کئے ،واضح رہے کہ میٹرک کے امتحانات میں لاہور بورڈ سے اڑھائی لاکھ طلباء و طالبات نے شرکت کی تھی۔دریں اثنا لاہور سمیت پنجاب بھر کے سرکاری کالجوں میں فرسٹ ایئر کے داخلے21 ستمبر سے شروع ہونگے۔ بتایا گیا ہے کہ داخلوں کے خواہش مند امیدوار داخلوں کے لئے درخواستیں آن لائن بھی بھجوا سکتے ہیں۔ محکمہ تعلیم پنجاب نے اس سلسلے میں صوبے بھر کے سرکاری کالجوں کے پرنسپلز کو مراسلہ جاری کردیا ہے۔ جس میں کہا گیا ہے کہ 21 ستمبر سے شروع ہونے والے فرسٹ ایئر کے داخلوں کا شیڈول کالجوں کے نوٹس بورڈ پر بھی آویزاں کئے جائیں۔
