کراچی(این این آئی)پاکستان میں اگرچہ کورونا کے کیسز کم ہوئے ہیں تاہم ابھی بیماری مکمل طور پر ختم نہیں ہوئی۔ ننھے بچوں کو کورونا سے محفوظ رکھنے کے لیے کراچی کے ایک اسکول نے انوکھا طریقہ ڈھونڈ لیا۔۔۔بہادر آباد میں واقع زی انٹرنیشنل اسکول نے حل ڈھونڈ نکالا، ڈرائیو تھرو رزلٹ۔ اسکول کھلنے والے ہیں، بچوں کو پچھلی کلاس کا رزلٹ بھی دینا ہے، کورونا کا خطرہ بھی موجود ہے، رش نہیں لگانا۔
گاڑی میں آو، اندر بیٹھے رزلٹ لو، گاڑی میں بیٹھے تصویر بنواو اور وہیں سے گھر چلے جاو۔ جشن آزادی کے موقع پر ملنے والے نتائج پر بچے والدین کے ہمراہ رزلٹ لینے پہنچ گئے۔ اس انوکھے طریقے سے رزلٹ ملنے پر بچے بھی خوش نظر آئے۔۔گاڑی میں بیٹھے بیٹھے ہی مسکرا کر تصاویر بناتے رہے۔ قبل ازیں سیلابی ویلفیئر ٹرسٹ کے روح رواں مولانا بشیر احمد فاروقی نے پرچم کشائی کی اور ملکی امن و سلامتی کے لیے دعا کرائی۔ اس موقع پر والدین نے اسکول کی اس کاوش کو سراہتے ہوئے اسے منفرد طریقہ قرار دیا،والدین کا کہنا تھا کہ جشن آزادی پر ملنے والے بچوں کے نتائج نے آج کے دن کی خوشی دوبالا کردی ہے۔ زی انٹرنیشنل اسکول کے ڈائریکٹر فنانس شکیب جبار اور ہیڈ مسٹریس شازیہ عابد کے مطابق جشن آزادی کے حوالے سے منعقدہ تقریب میں ایک ہزارسے زائد بچوں کو نتائج دیئے گئے۔ اسکول کی ڈائریکٹر کمیونیکیشنز سمیرا رضا رحمانی نے کہا کہ یہ آئیڈیا صدر ذی انٹرنیشنل ذیشان الطاف لوہیا کا ہے اور وہ چاہتے ہیں کہ بچے کورونا سمیت ہر قسم کی بیماریوں سے محفوظ رہیں۔ تقریب میں ایڈیشنل کلکٹر کسٹم ڈاکٹر علی رضا سپرا، گورنر روٹری ڈاکٹر فرحان عیسی، چیف کارپوریٹ کمشنر آر ٹی او ریجن کراچی سید آفتاب امام، ایڈیشنل آئی جی سی ٹی ڈی ڈاکٹر جمیل احمد، سابق صوبائی وزیر روف صدیقی، معیز بن زاہد و دیگر کے علاوہ میمن برادری کی ممتاز شخصیات نے بھی شرکت کی۔ اس موقع پر مہمانوں نے اسکول کے باہر پودے بھی لگائے۔
