مردان (این این آئی) جمعیت علماء اسلام ف کے سربراہ مولانا فضل الرحمن نے کہاہے کہ مرکزی حکومت مکمل طور پر ناکام ہو چکی ہے کوئٹہ اور حیات آباد کے واقعات نے حکومت کی کارکردگی کا پول کھول دیا ہے،بی آرٹی میں سات ارب روپے کی کرپشن ہوئی ہے لیکن نیب اور دیگر اداروں نے اس پر چھپ سادھ لی ہے۔ان خیالات کا اظہار انہوں نے جمعیت علماء اسلام کے
رہنما حافظ اسماعیل کے بھائی حافظ بشیر احمد کی وفات پر مردان میں اظہار تعزیت کے موقع پر گفتگو کرتے ہوئے کیا۔انہوں نے مرحوم کو خراج عقیدت پیش کرتے ہوئے انکے بلند درجات کے لئے فاتحہ خوانی کی ۔اس موقع پر پارٹی کے رہنما وسابق ایم پی اے مولانا امانت شاہ حقانی،مولانا تاج الامین جبل،مفتی سلیم حلیمی ،مولانا قیصر الدین اور مولانا ضیاء اللہ جان ہاشمی بھی موجود تھے۔مولانا فضل الرحمان نے کہاکہ عوام موجود ہ حکومت کی پالیسیوں سے تنگ آ چکی ہے ۔حکومت کے خلاف اپوزیشن ایک پیج پر ہے اور بہت جلد اسلام آباد لاک ڈاؤن ہوگا جس میں تیس لاکھ کے قریب عوام کو اکٹھا کرکے ایک دن میں عمران کا حکومت ختم کردیں گے۔انہوں نے کہاکہ ایک کروڑ نوکریاں دینے والے یوٹیلٹی سٹور اور دیگر اداروں سے ملازمین کو نکال رہے ہیں جو کہ حکومت کی کارکردگی کا منہ بولتا ثبوت ہے۔انہوں نے کہاکہ حکومت اپنی ناکام پالیسیوں کی وجہ سے بوکھلاہٹ کی شکار ہو چکی ہے۔حکومت نے سو فیصد گیس اور بجلی مہنگی کر کے عوام سے منہ کا نوالہ چھین لیا ہے۔پہلے جون میں بجٹ پیش کیا جاتا تھا لیکن آج آئے روز بجٹ پیش کیا جارہا ہے۔انہوں نے کہاکہ حکومت نیب کے ذریعے سیاسی لوگوں کو انتقام کا نشانہ بنا کراپوزیشن کو خاموش کرانا چاہتی ہے لیکن انہیں یہ یاد رکھنا چاہےئے کہ اپوزیشن کی ایک آواز سے پورا ملک بلاک ہو سکتا ہے۔
