اسلام آباد (این این آئی)پاکستان مسلم لیگ (ن) کے صدر اور قائد حزب اختلاف شہبازشریف نے حکومت سے مطالبہ کیا ہے کہ مہنگائی اور افراط زر کے پیش نظر کم ازکم تنخوا اٹھارہ ہزار روپے کی جائے۔ ایک بیان میں انہوں نے کہاکہ مہنگائی میں ریکارڈ اضافے اور
رمضان المبارک کی آمد کے پیش نظر فوری طورپر تین ہزار روپے تنخواہ میں اضافہ کیاجائے ۔ انہوں نے کہاکہ یہ اضافہ سرکاری اور نجی تمام ملازمین کو دیاجائے، عمل درآمد یقینی بنانے کے لئے موثر اقدامات کئے جائیں۔ انہوں نے کہاکہ ایک لاکھ روپے تک ماہانہ کمانے والوں کی تنخواہ میں بیس فیصد فوری اضافہ کیاجائے ۔ انہوں نے کہاکہ یہ اضافہ نجی اور سرکاری دونوں شعبہ جات کے ملازمین کو دیا جائے ۔ انہوں نے کہاکہ مہنگائی اور افراط زر کی شرح ہمارے دور میں 47 سال میں کم ترین تین فیصد تھی۔ انہوں نے کہاکہ مہنگائی اور افراط زر کی شرح 9.4فیصد ہوچکی ہے۔ انہوں نے کہاکہ ان حالات میں غریب اور تنخواہ دار طبقہ مہنگائی کے بوجھ تلے پس چکا ہے۔ انہوں نے کہاکہ فوری ریلیف نہ دیا گیا تو عوام کے لئے ماہ صیام گزارنا ممکن نہیں ہوگا۔ انہوں نے کہاکہ حکومت غریب، مزدور اور تنخواہ دار مڈل کلاس طبقات کا احساس کرے اور بے حسی کا مظاہرہ نہ کرے۔ انہوں نے کہاکہ عوام کے لئے ایک وقت کی روٹی کھانا مشکل ہوگیا ہے۔
