لاہور( این این آئی)پاکستان مسلم لیگ (ن) کے بعض رہنمائوں نے قیادت کو بد ترین مہنگائی پرحکومت کیخلاف سڑکوں پر آکر احتجاج کرنے کی تجویز دی ہے ۔ ذرائع کے حوالے سے بتایا گیا ہے کہ مسلم لیگ (ن) کے کچھ رہنمائوں کا کہنا ہے کہ حکومت کے اقدامات کی وجہ سے مہنگائی بڑھنے سے عوام شدید پریشان ہیں اور ایسے حالات میں ہمیں سڑکوں پر آکر پر امن طور پر اپنا احتجاج ریکارڈ کرانا چاہیے ۔
ایک رہنما کا کہنا تھاکہ موجودہ حالات میں عوام مہنگائی سے شدید پریشا ن ہیں اور اپوزیشن کی جانب سے موثر احتجاج نہ ہونے کی وجہ سے متنفر نظر آتے ہیں ۔ ذرائع کے مطابق مسلم لیگ (ن) کی جانب سے قومی اسمبلی اور پنجاب اسمبلی کے آئندہ اجلاسوں میں مہنگائی کے خلاف شدید احتجاج کرنے کا فیصلہ کیا گیا ہے اور اس حوالے سے پیپلز پارٹی سمیت دیگر اپوزیشن جماعتوں سے بھی رابطے بڑھائے جائیں گے ۔
