اسلام آباد (این این آئی)وزیرِ اعظم عمران خان نے سی ڈی اے کووفاقی دارالحکومت میں واقع تمام عمارات میں معذور افراد کیلئے تمام مطلوبہ سہولتوں کی فراہمی کو یقینی بنانے کیلئے فوری طور پر اقدامات کرنے کی ہدایت کی ہے۔ تفصیلات کے مطابق وزیراعظم عمران خان نے وفاقی دارلحکومت اسلام آباد میں واقع تمام عمارات میں معذور افراد کیلئے تمام مطلوبہ سہولتوں کی فراہمی کو یقینی بنانے کیلئے فوری طور پر اقدامات کرنے کی ہدایت کی ہے جن میں مخصوص سیڑھیوں کی تعمیر، لفٹس، ٹوائلٹس

ودیگر سہولیات شامل ہیں۔ وزیراعظم نے ہدایت کی کہ مستقبل کی تمام تعمیرات کی ڈیزائننگ کے دوران معذور افراد کیلئے ضروری سہولیات کی فراہمی کو مد نظر رکھا جائے۔ وزیراعظم نے کہا کہ سی ڈی اے قواعد و ضوابط کے ذریعے اس بات کو یقینی بنائے کہ اس کے دائرہ کار میں آنے والی تمام نجی عمارات کی تعمیر میں بھی یہ سہولیات فراہم کی جائیں۔ وزیراعظم نے سی ڈی اے کو اس ضمن میں ترجیحی بنیادوں پر ضروری اقدامات لینے اور ماہانہ بنیادوں پر پیشرفت سے آگاہ کرنے کی بھی ہدایت کی۔