اسلام آباد (این این آئی)وفاقی وزیراطلاعات چودھری فواد حسین نے کہا ہے کہ بھٹو کے نواسے نے ضیاء الحق کے منہ بولے بیٹے سے ہاتھ ملا کر صدی کا سب سے بڑا یوٹرن لیا ہے،نواز شریف کی صحت پر سیاست خود اپوزیشن کر رہی ہے وہ نہیں چاہتی نواز شریف صحت مند ہوں اور ان کا علاج ہو۔
وفاقی وزیراطلاعات چودھری فواد حسین نے بلاول بھٹو زرداری کی جیل میں محمد نوازشریف سے ملاقات کے حوالے سے اپنے ایک بیان میں کہا ہے کہ بھٹو کے نواسے نے ضیاء الحق کے منہ بولے بیٹے سے ہاتھ ملا کر صدی کا سب سے بڑا یوٹرن لیا۔ انہوں نے کہاکہ آج بھٹو کے خون پر میثاق صلح ہوگیا ہے۔ انہوں نے کہاکہ بلاول خود کو نوازشریف کے سیاسی مزار کا مجاور دکھا کر پنجاب میں سیاسی میلہ لوٹنا چاہتے ہیں۔انہوں نے کہا کہ مسلم لیگ (ن) سے مایوس نوازشریف کا ملاقاتی اب بلاول ہی رہ گیا ہے۔ انہوں نے کہا کہ نواز شریف اپنی پارٹی سے بڑے نالاں ہیں،محمد نواز شریف کی صحت پر سیاست خود اپوزیشن کر رہی ہے۔انہوں نے کہا کہ اپوزیشن نہیں چاہتی کہ نواز شریف صحت مند ہوں اور ان کا علاج ہو۔انہوں نے کہاکہ وزیراعظم عمران خان کہہ چکے ہیں کہ محمد نواز شریف جہاں سے چاہیں علاج کرائیں،مگر اپوزیشن ان کی بیماری کو سیاسی پروجیکٹ کے طور پر استعمال کر رہی ہے۔ انہوں نے کہاکہ دو سیاسی مایوسوں کی ملاقات سے مایوسی ہی برآمد ہوئی ہے۔ وفاقی وزیراطلاعات چودھری فواد حسین نے کہا ہے کہ بھٹو کے نواسے نے ضیاء الحق کے منہ بولے بیٹے سے ہاتھ ملا کر صدی کا سب سے بڑا یوٹرن لیا ہے،نواز شریف کی صحت پر سیاست خود اپوزیشن کر رہی ہے وہ نہیں چاہتی نواز شریف صحت مند ہوں اور ان کا علاج ہو۔
