فیصل آباد(اے این این ) مسلم لیگ( ن) کے مرکزی رہنما وسابق وزیر مملکت برائے داخلہ محمد طلال چوہدری نے کہا ہے کہ میاںنوازشریف ایک اشارہ کریں لیگی کارکن حکومت کے درودیوار ہلا دیں گے ، حکومتی وزرا ء اور عمران خان کے مشیر ملک کو ایٹمی طاقت بنانے والے سابق وزیراعظم کی بیماری کا تمسخر اڑا رہے ہیں۔
نوازشریف عالم اسلام کے ہیرو ہیں۔ان خیا لات کاا ظہار گزشتہ رو ز سابق ضلعی صدر ایم ایس ایف رائے علی نواز کلیار کے والد محترم رائے شوکت علی کلیار کی وفات پر معززین سے گفتگو کرتے ہوئے کیا۔طلال چوہدری نے کہاکہ نوازشریف نے پاکستان کو ایٹمی طاقت بنایا جس کی وجہ ہے کہ آج ہم ان پر فخر کررہے اور بھارت کے ساتھ برابری کی سطح پر کھڑے ہیں اگر بھارت نے جارحیت کی تو پوری قوم منہ توڑ جواب دینے کیلئے تیار ہے ۔ انہوں نے کہا کہ تین بار ملک کا وزیر اعظم بننے والے میاں محمد نوازشریف کا علاج کروانے کی بجائے حکومتی وزرا اور عمران خان کے مشیر ایک بیمار کا تمسخر اڑا رہے ہیں پوری قوم جانتی ہے کہ میاں محمد نوازشریف محب وطن ہیں جو سلوک ان کے ساتھ کیا جارہاہے وہ قابل افسوس ہے۔انہوں نے کہاکہ لیگی کارکن نوازشریف کے لئے جان دینے کو بھی تیار ہیں وہ ایک اشارہ کریں ہم حکومت کے درودیوار ہلا کر رکھ دیں گے ۔ اس موقع پر سابقہ چیرمین مارکیٹ کمیٹی اسد نواز کلیار ،ضلعی صدر یوتھ ونگ آفتاب اکبر چوہدری ودیگرنے بھی مرحوم کی مغفرت اور درجات کی بلندی کے لئے دعا کی ۔
