اسلام آباد (این این آئی) سینیٹ کی آبی وسائل کمیٹی نے مہمند ڈیم کی تعمیر کا ٹھیکہ وزیراعظم کے مشیر عبدالرزاق داؤد کی کمپنی کو دیئے جانے پر تحفظات کا اظہار کردیاہے۔پیر کو سینیٹ کی آبی وسائل کمیٹی کا اجلاس چیئرمین سینیٹر شمیم آفریدی کی زیر صدارت منعقد ہوا ۔

اجلاس میں کمیٹی نے مہمند ڈیم کا ٹھیکہ مشیر تجارت عبدالرزاق داؤد کی کمپنی ڈیسکون کو دینے پر تحفظات کا اظہار کیا۔ چیئرمین کمیٹی سینیٹر شمیم آفریدی نے کہا کہ مہمند ڈیم ٹھیکے پر ہم مطمئن نہیں ہیں۔کمیٹی کے رکن محمد یوسف بادینی نے مہمند ڈیم ٹھیکے پر وزارت سے جواب طلب کرتے ہوئے کہا کہ کمیٹی کے آئندہ اجلاس میں مہمند ڈیم کا معاملہ ایجنڈے میں شامل کیا جائے، بلوچستان میں ڈیسکون کمپنی گروک ڈیم تو بنا نہیں سکی لیکن اب 300 ارب روپے کا منصوبہ دیا جا رہا ہے۔سینیٹر میر حاصل خان بزنجو نے کہا کہ وزارت آبی وسائل کا چیف جسٹس سے کیا جھگڑا ہے ؟،سنگ بنیاد کی تقریب کیوں تاخیر سے کی جا رہی ہے، کیا آپ لوگ چیف جسٹس کی ریٹائرمنٹ کا انتظار کر رہے ہیں؟۔مہمند ڈیم کے سوال پر پی ٹی آئی رہنماء ولید اقبال اور دیگر ارکان میں گرما گرمی بھی ہوگئی۔ ولید اقبال نے کہا کہ مہمند ڈیم ایجنڈے کا حصہ نہیں تو پھر اس پر بات کیوں ہو رہی ہے؟۔کمیٹی نے آئندہ اجلاس میں مہمند ڈیم کی تعمیر اور معاہدے کے حوالے سے متعلقہ حکام سے بریفنگ طلب کرلی۔ چیئرمین کمیٹی نے ہدایت کی کہ حکام کمیٹی کے آئندہ اجلاس میں مکمل تیاری کے ساتھ آئیں۔