اسلام آباد(آئی این پی ) پاکستان پیپلزپارٹی پنجاب کے سیکریٹری اطلاعات ممبر پنجاب اسمبلی سید حسن مرتضیٰ نے وزیرمملکت برائے داخلہ کے اس بیان کہ اسلام آباد کے تعلیمی اداروں میں 75فیصد لڑکیاں نشہ کرتی ہیں اور 45فیصد لڑکے کی سخت الفاظ میں مذمت کرتے ہوئے طالبات پر جھوٹا الزام لگانے پر عمران خان سے معافی مانگنے کا مطالبہ کیا ہے۔ انہوں نے کہا کہ لگتا ہے کہ شہریار آفریدی خود نشے میں تھے اس لئے بہکی بہکی اور بے بنیاد باتیں کیں۔

ان کے بیان کی وجہ سے طالبات اور طلباء کے والدین کو سخت اذیت پہنچی ہے۔ سید حسن مرتضی نے کہا کہ طالبات قوم کی بیٹیاں ہیں ان پر شرمناک تہمت شہریار آفریدی کو طالبان کی سوچ کے ساتھ ورثے میں ملی ہے۔ انہوں نے کہا کہ طالبان بندوق کے زور پر لڑکیوں کو تعلیم کے حق سے محروم کر رہے تھے جبکہ پی ٹی آئی جھوٹے اور بے بنیاد الزامات کا شور مچا کر لڑکیوں کو تعلیم کے حق سے محروم کرنے کی کوشش کر رہی ہے۔

موضوعات:عمران خان سے معافی مانگنے کا مطالبہ