اسلام آباد (نیوز ڈیسک) سعودی عرب کی جانب سے امدادی پیکج کی ایک اور قسط پاکستان کو دے دی گئی، اس امدادی پیکج کے ذریعے آنے والے ڈالرز سے پاکستانی زرمبادلہ میں بڑا اضافہ ہو گیا ہے، پاکستانی زرمبادلہ کے ذخائر میں 83 کروڑ ڈالر سے زائد کا اضافہ ہو چکا ہے، سٹیٹ بینک کی رپورٹ کے مطابق زرمبادلہ کے ذخائر میں 83کروڑ ڈالر کا اضافہ ہوا ہے۔

سٹیٹ بینک کے ذخائر 78 کروڑ ڈالر اضافے کے بعد 8 ارب 4 کروڑ ڈالر ہوگئے ہیں۔شیڈول بینکوں کے ذخائر میں بھی اضافہ ہوا ہے اس طرح ان کے ذخائر 6 ارب 53کروڑ ڈالر ہوگئے۔دریں اثناء وفاقی وزیر اطلاعات چوہدری فواد حسن نے بتایا کہ جنوری میں متحدہ عرب امارات کے ولی عہد اور فروری میں سعودی عرب کے ولی عہد پاکستان کا دورہ کریں گے۔ انہوں نے بتایا کہ سعودی عرب کے ولی عہد فروری میں سب سے بڑی غیر ملکی سرمایہ کاری کا معاہدہ کرنے یہاں آ رہے ہیں ۔دوسری جانب وزیر خارجہ شاہ محمود قریشی کا کہنا ہے کہ وزیراعظم کو سعودی عرب میں سرمایہ کاری کانفرنس میں شرکت کی دعوت دی گئی، اس موقع پر ان کی شاہ سلمان، ولی عہد شہزادہ محمد بن سلمان اور دیگر سعودی حکام کے ساتھ ملاقاتیں ہوئیں، دوطرفہ علاقائی اور اقتصادی تعلقات پر بات چیت کی گئی، سعودی پیکج کے لئے سعودی عرب نے کسی قسم کی کوئی شرط عائد نہیں کی، ہم نے یمن کے لئے ثالثی کا کردار ادا کرنے کی پیشکش کی ہے، مجموعی طور پر پاکستان کو سعودی عرب سے 9 ارب ڈالر کی سہولت ملے گی جس میں ادائیگیوں کے توازن کے لئے تین ارب ڈالر کی امداد اور موخر ادائیگی کے لئے معاونت بھی شامل ہے اس سے پاکستان کی معیشت کو سہارا ملے گا۔ سٹیٹ بینک کی رپورٹ کے مطابق زرمبادلہ کے ذخائر میں 83کروڑ ڈالر کا اضافہ ہوا ہے۔