لاہور ( این این آئی)وزیراعلیٰ پنجاب سردار عثمان بزدار نے کہا ہے کہ پناہ گاہ کے بے گھرمکینوں کو مفت علاج کی سہولت بھی فراہم کی جائے گی،عارضی پناہ گاہوں میں شام کے وقت موجودڈاکٹر بیمار مکینوں کا طبی معائنہ کریں گے اورادویات بھی فراہم کی جائیں گی،پنجاب کے دیگر اضلاع میں بھی مخیرحضرات کے اشتراک سے پناہ گاہیں قائم کی جائیں گی۔
وزیراعلیٰ آفس میں پناہ گاہ سے متعلق امور کا جائزہ لینے کیلئے خصوصی اجلاس کی صدارت کرتے ہوئے وزیراعلیٰ نے کہا کہ پناہ گاہ کے بیمارمکینوں کومزید علاج معالجے کیلئے ڈاکٹر کی ہدایت پر ہسپتالوں میں ریفر کیاجاسکے گا۔وزیراعلیٰ نے ہدایت کی کہ پناہ گاہوں میں رہنے والے افراد کو بروقت رات کا کھانا اورناشتہ فراہم کیا جائے اورکھانے اور ناشتے کی بروقت فراہمی کے حوالے سے کوئی شکایت نہیں آنی چاہیے۔مسافروں کی حفاظت کیلئے سول ڈیفنس رضاکاروں کیساتھ ساتھ پولیس تعینات کی جائے۔ مسافروں کی بائیو میٹر ک تصدیق کیلئے پنجاب انفارمیشن ٹیکنالوجی بورڈ کی معاونت حاصل کی جائے گی۔مستقل پناہ گاہوں کی عمارتوں کی جلد ازجلد تعمیر یقینی بنائی جائے ۔وزیراعلیٰ نے پولیس کو ہدایت کی کہ شہر میں نشہ فراہم اوراستعمال کرنے والوں کے خلاف کریک ڈاؤن کیا جائے ۔وزیراعلیٰ نے پناہ گاہ میں مسافروں کے قیام کے حوالے سے جامع قواعدوضوابط وضع کرکے آویزاں کرنے کی ہدایت بھی کی ۔ اجلاس میں وزیراعلیٰ کو مستقل پناہ گاہوں کی تعمیر کے سلسلے میں پیش رفت سے آگاہ کیا گیا۔وزیراعلیٰ کی زیر صدارت خصوصی اجلاس میں سیکرٹریز سوشل ویلفےئر،انفارمیشن،ڈی جی ایل ڈی اے ،ڈی جی پی آر ،ڈی سی لاہورنے شرکت کی ہے۔ سردار عثمان بزدار نے کہا ہے کہ پناہ گاہ کے بے گھرمکینوں کو مفت علاج کی سہولت بھی فراہم کی جائے گی
