اسلام آباد (مانیٹرنگ ڈیسک) وفاقی کابینہ میں مزید تین وزرا کو شامل کئے جانے کا امکان، اتحادیوں سمیت پاکستان تحریک انصاف کے 6 سے 7 نام زیر غور ،ایک وفاقی وزیر اور دو وزرائے مملکت شامل کئے جا سکتے ہیں، نئے وزرا میں سے ایک کو مستعفی وفاقی وزیر اعظم سواتی کی جگہ سائنس اینڈ ٹیکنالوجی کا قلمدان دیا جا سکتا ہے، ذرائع۔تفصیلات کے مطابق وفاقی کابینہ میں

مزید توسیع کا امکان ظاہر کیا جا رہا ہے جبکہ وزیر مملکت برائے مواصلات مراد سعید آج وفاقی وزیر کا حلف اٹھائیں گے۔ قائم مقام صدر صادق سنجرانی نے مراد سعید کی بطور وفاقی وزیر تعیناتی کی سمری پر دستخط کردیئے ہیں، قائم مقام صدر صادق سنجرانی کو مراد سعید کو وفاقی وزیر بنانے کی سمری وزیراعظم کو ارسال کی تھی۔ مراد سعید اس وقت وزیر مملکت برائے مواصلات اور پوسٹل سروسز کے طورپر فرائض سرانجام دے رہے تھے۔قائم مقام صدر صادق سنجرانی نے وزیر اعظم عمران خان کی ایڈوائس پر مراد سعید کے وفاقی وزیر مقرر ہونے کی سمری پر دستخط کر دیئے ہیں۔ذرائع کے مطابق وزراء کے لیے اتحادیوں سمیت پاکستان تحریک انصاف کے 6 سے 7 نام زیر غور ہیں۔ وزیراعظم عمران خان نے اتحادیوں کو خوش کرنے کا فیصلہ کیا ہے جبکہ امکان ظاہر کیا جا رہا ہے کہ وفاقی کابینہ میں دو سے تین نئے وزرا شامل کئے جائینگے جن میں سے ایک اتحاد جماعت سے ہو گا ۔ وفاقی کابینہ میں ایک وفاقی وزیر جبکہ دو وزرائے مملکت شامل کئے جا سکتے ہیں۔ ذرائع کے مطابق نئے وفاقی وزیر کو اعظم سواتی کی جگہ سائنس ایند ٹیکنالوجی کا قلمدان بھی دیا جا سکتا ہے۔ اعظم سواتی کےمستعفی ہونے کے بعد سائنس ایڈ ٹیکنالوجی کا قلمدان خالی ہے۔پی ٹی آئی ذرائع کے مطابق وزیراعظم عمران خان کی منظوری کے بعد حتمی فیصلہ کیا جائے گا۔