اسلام آباد (مانیٹرنگ ڈیسک) معروف صحافی سلیم صافی نے ایک نجی ٹی وی چینل پروگرام میں گفتگو کرتے ہوئے کہا کہ اگر عمران خان کا پیمانہ ایمانداری اور سادگی ہے تو پھر عثمان بزدار کی جگہ مولانا طارق جمیل کو پنجاب کے وزیراعلیٰ کا عہدہ دے دیا جائے۔ سلیم صافی نے کہا کہ ہمارے نزدیک حکمرانی کے لیے اہلیت، صلاحیت اور استعداد ضروری ہے، اگر وزیراعظم کا پیمانہ ایمانداری اور سادگی ہے تو مولانا طارق جمیل اس معیار پر پورا اترتے ہیں، وزیراعظم عمران خان بھی اس بات کو مانیں گے کہ عثمان بزدار سے زیادہ
سادگی اور ایمانداری مولانا طارق جمیل میں ہے، سلیم صافی نے کہا کہ آج کل مولانا طارق جمیل وزیراعظم عمران خان کے مداح بھی ہیں، مولانا طارق جمیل کے ملک میں بڑی تعداد میں خیر خواہ بھی موجود ہیں اور وہ ریاست مدینہ کے ماڈل سے بھی اتفاق کرتے ہیں، معروف صحافی سلیم صافی نے کہاکہ اس لیے بہتر یہ ہے کہ مولانا طارق جمیل کو وزیراعلیٰ پنجاب بنا دیا جائے اور شاید مولانا طارق جمیل بھی اس عہدے کے لیے ہاں کر دیں کیونکہ وزیراعظم عمران خان کے تصور ریاست مدینہ سے بھی وہ اتفاق کرتے ہیں۔
