اسلام آباد (مانیٹرنگ ڈیسک) معروف مذہبی سکالر طارق جمیل نے وزیراعظم عمران خان کے ساتھ ساتھ ان کی اہلیہ کی بھی تعریف کر دی۔ان کا ایک ویڈیو پیغام سامنے آیا ہے جس میں انہوں نے وزیراعظم کی تعریف کی اور پاکستانی عوام سے پاکستان کو فلاحی ریاست جیسا بنانے کے لیے عمران خان کی مدد کرنے کی اپیل کی۔ اس کے ساتھ ہی ممتاز عالم دین طارق جمیل نے عمران خان کی اہلیہ اور خاتون اول بشریٰ بی بی کی بھی تعریف کی اور خواتین کوکہا کہ آپ ان کی زندگی سے سبق سیکھیں۔ پاکستانی تاریخ میں
اتنے وزیراعظم آئے ان کے ساتھ بڑی خواتین اول آئیں۔یہ پہلی خاتون اول ہیں جو مکمل پردے میں ہیں اور مکمل طریقے سے اسلامی حجاب کرتی ہیں۔اس لیے پورے پاکستان کی خواتین کے لیے خاتون اول کی زندگی ایک پیغام ہے کہ اتنے بڑے منصب پر ہوتے ہوئے بھی وہ مکمل حجاب کرتی ہیں۔عمران خان اپنی مثال آپ ہیں اور ہم سب عمران خان کے لیے دعا گو ہیں اور اللہ تعالیٰ انہیں ہر شر سے بچائے۔واضح رہے کہ چند دن پہلے بھی ایک تقریب میں انہوں نے وزیراعظم عمران خان کی تعریف کی تھی ۔
