اسلام آباد(آئی این پی)وفاقی وزیر اطلاعات ونشریات فواد چوہدری نے کہا ہے کہ آصف زرداری اور نوازشریف کی سیاست اب ختم ہو چکی ہے ان کے مقدمات ہی اتنے بڑے ہیں کہ اب وہ مزید سیاست نہیں کر سکتے ، ان کے خلاف کوئی بھی کیس ہم نے نہیں بنایا اور نہ ہی ہم نے نیب میں کسی کو بھرتی کروایا ، اب دیکھنا پڑے گا کہ زرداری اورنوازشریف بچ پاتے ہیں تا نہیں، مریم اورنگزیب کے خلاف کیس کا مجھے نہیں پتا یہ نیب اور مریم اورنگزیب کا معاملہ ہے،شہبازشریف کے علاوہ

اپوزیشن سے کوئی بھی چیئرمین پبلک اکاؤنٹس کمیٹی بن سکتا ہے ، میڈیا میں نئی ریگولیٹری اتھارٹی بنانی پڑے گی ، پیمرا سے پوری طرح مطمئن نہیں ۔وہ منگل کو نجی ٹی وی سے گفتگو کر رہے تھے ۔ فواد چوہدری نے کہا کہ آصف علی زرداری اور نوازشریف نے ایک مدت تک کامیاب سیاست کی اور اقتدار میں بھی رہے مگر اب انہوں نے اپنے آخری انتخابات لڑ لیے ہیں ، اب وہ اپنے مقدمات اور قانونی چیلنجز کا سامنا کر رہے ہیں ، ان کی انتخابی سیاست اب ختم ہو چکی ہے ، ان کے مقدمات ہی اتنے بڑے ہیں کہ اب وہ مزید سیاست نہیں کر سکتے ، ان کے خلاف کوئی بھی کیس ہم نے نہیں بنایا اور نہ ہی ہم نے نیب میں کسی کو بھرتی کروایا ، اب دیکھنا پڑے گا کہ زرداری اورنوازشریف بچ پاتے ہیں تا نہیں ۔ انہوں نے کہا کہ بند کمروں میں خبریں اگر نہیں رکتی تو تحقیقات کی خبر کیسے رک سکتی ہے ، سعد رفیق اور سلمان رفیق گرفتار ہو گئے ہیں مگرابھی 50لوگ پورے نہیں ہوئے ۔ فواد چوہدری نے کہا کہ مریم اورنگزیب کے خلاف کیس کا مجھے نہیں پتا یہ نیب اور مریم اورنگزیب کا معاملہ ہے ۔وزیر اطلاعات نے کہا کہ نیب کو چاہیے کہ کسی بھی ہائی پروفائل شخص کے خلاف جو بھی خبر میڈیا کو فراہم کریں ، اس کا ثبوت بھی دیں ، سستی شہرت کیلئے شراب کی قرارداد لانے کی کوشش کی گئی جس نے شراب پینی ہوتی ہے وہ پی لیتا ہے ، قومی مفاد کے معاملات میں

اپوزیشن کو ساتھ لے کر چل رہے ہیں ، شہبازشریف کے علاوہ اپوزیشن سے کوئی بھی چیئرمین پبلک اکاؤنٹس کمیٹی بن سکتا ہے ، نوازشریف دور کے منصوبوں کا آڈٹ ان کا بھائی کیسے کر سکتا ہے ۔ انہوں نے کہا کہ میڈیا میں نئی ریگولیٹری اتھارٹی بنانی پڑے گی ، پیمرا سے پوری طرح مطمئن نہیں ہیں ، ماضی کی حکومتوں کے اشتہارات کی ادائیگیاں بھی ہم ہی کر رہے ہیں ، کل رقم کا50فیصد ایڈورٹائزنگ ایجنسیوں کو ادا کردیا گیا ہے اوراگلے دس دن تک باقی ادائیگیاں بھی کی جائیں گی ، پاکستان کا میڈیا اس وقت بھی آزاد اورطاقتور ہے ۔