لاہور( این این آئی )نامزد وزیر اعلیٰ پنجاب سردار عثمان بزدار کے والد سابق رکن اسمبلی فتح محمد خان بزدار نے کہا ہے کہ عمران خان نے پسماندہ ترین علاقے سے وزیر اعلیٰ پنجاب کیلئے نامزدگی کرکے پارٹی منشور پر عملدرآمد کا عملی ثبوت دیا ہے ۔ فتح محمد بزدار نے کہا کہ میں سمجھتا ہوں کہ عمران خان کاتاریخ ساز فیصلہ پنجاب خصوصاًجنوبی پنجاب کی ترقی و خوشحالی میں اہم کردار ادا کرے گا ۔انہوں نے کہا کہ جنوبی پنجاب آج بھی پسماندگی
کا شکار ہے اور مجھے خوشی ہورہی ہے کہ پی ٹی آئی کی قیادت نے اپنے منشور کے مطابق جنوبی پنجاب کے پسماندہ علاقے کے رکن اسمبلی کو بطور وزیر اعلی نامزد کرکے عوام کے دل جیت لئے ہیں ۔انہوں نے کہا کہ سابقہ حکومتوں میں ہمارے پسماندہ علاقوں کو نظر انداز کیا گیا اوریہی وجہ ہے کہ 2018ء کے انتخابات میں پی ٹی آئی جنوبی پنجاب میں بھاری اکثریت سے کامیاب ہوئی اور عوام نے عمران خان کی قیادت پر مکمل اعتماد کیا۔
