لاہور(آئی این پی)مبینہ کر پشن میں گر فتار فواد حسن فواد کے بھائی وقار حسن نے نیب کی گرفتاری سے بچنے کیلئے ہائیکورٹ سے رجوع کرلیا، عدالت نے جائیداد کے معاملے میں وقار حسن کو نیب تحقیقات میں شامل ہونیکی ہدایت کر دی۔تفصیلات کے مطابق جسٹس طارق عباسی کی سربراہی میں 2رکنی بنچ نے وقار حسن کی درخواست پرسماعت کی۔ درخواست گزار کی جانب سے عدنان شجاع بٹ ایڈووکیٹ نے موقف اختیار کیا کہ نیب میں اس کے موکل وقار حسن کے خلاف
بے نامی جائیداد کے معاملے پر تحقیقات جاری ہیں، انکوائری میں شامل ہونے کے باوجود گرفتاری کا خدشہ ہے درخواست گزار نے استدعا کی کہ نیب کو گرفتار نہ کرنے کا حکم دیا جائے۔ عدالت نے نیب وکیل سے استفسار کیا کہ کیا آپ وقار حسن کو گرفتار کرنا چاہتے ہیں، جس پر نیب وکیل کا کہنا تھا کہ وقار حسن کے خلاف تحقیقات کر رہے ہیں تاہم وارنٹ گرفتاری حاصل نہیں کیے جس پرعدالت نے نیب گرفتاری سے بچنے کیلئے درخواست غیر موثر قرار دے کر نمٹا دی۔
