چناری(آن لائن )بھارتی فوج کی وادی لیپہ کے دیہی علاقوں پر گولہ باری سے دو افراد زخمی دو مکان جزوی طور پر تباہ ہو گئے بھارتی فائرنگ کے باعث مقامی تعلیمی ادارے بند کر دئیے گئے علاقہ میں شدید خوف وہراس۔ پاک فوج کی بھر پور جوابی کارروائی بھارتی گنیں خاموش ہو گئیں۔تفصیلات کے مطابق بدھ اور جمعرات کی درمیانی رات اور علی الصبح بھارتی فوج نے آزاد کشمیر کے ضلع ہٹیاں بالا سے ملحقہ لائن آف کنٹرول کے وادی لیپہ سیکٹر کے گاؤں لبگراں پر چھوٹے
بڑے ہتھیاروں سے فائرنگ اور گولہ باری کی جس سے دو افراد محمد اکرم اور محمد سیلم زخمی ہو گئے جبکہ محمد اشرف مغل اور محمد یعقوب کے رہائشی مکانات جزوی طور پر تباہ ہوئے۔ بھارتی فائرنگ کے باعث علاقہ میں شدید خوف وہراس پھیل گیا انتظامیہ نے حفاظتی نقطہ نظر کے تحت مقامی تعلیمی ادارے بند کر دیے پاک فوج کی موثر جوابی کارروائی کے بعد بھارتی گنوں کو سانپ سو نگھ گیا جس کے بعد سول آبادی نے سکھ کا سانس لیتے ہوئے پاک فوج زندہ باد کے نعرے بلند کیے۔
