اسلام آباد(آئی این پی)پاکستان تحریک انصاف کے چیئرمین اور وزارت عظمیٰ کے مضبوط امیدوار عمران خان نے آئندہ حکومت میں وزارتوں سے متعلق اہم فیصلے کر لئے ہیں۔وفاقی کابینہ 20اگست کو حلف اٹھائے گی، اس حوالے سے چیئر مین پی ٹی آئی عمران خان کی مشاورت حتمی مراحل میں داخل ہوگئی ہے اور وزارتوں سے متعلق اہم فیصلے کر لیے گئے ہیں۔ ذرائع کے مطابق عبدالرزاق داود کو وزیراعظم کا مشیر برائے تجارت اور بابر اعوان کو مشیرِ قانون بنایا جاسکتا ہے،عمران خان نے وزارت داخلہ کا قلمدان فی الحال اپنے پاس رکھنے
کا فیصلہ کیا ہے۔شاہ محمود قریشی کو وزارت خارجہ کا قلمدان دیا جائے گا، وزارت دفاع کیلئے پرویز خٹک اور وزارت خزانہ کیلئے اسد عمر کا نام زیر غور ہے، وزارت اطلاعات و نشریات کیلئے فواد چوہدری مضبوط امیدوار سمجھے جا رہے ہیں، وزارت پانی و بجلی اور وزارت توانائی کا تاحال کوئی فیصلہ نہیں ہوا۔واضح رہے کہ پاکستان کے 19ویں وزیراعظم کا انتخاب 17اگست کو ہوگا اور وزارت عظمیٰ کیلئے تحریک انصاف کی طرف سے عمران خان اور مسلم لیگ (ن) کی جانب سے صدر مسلم لیگ (ن) شہباز شریف میدان میں ہیں۔
