اسلام آباد (این این آئی)تحریک انصاف نے قومی اسمبلی کے اسپیکر اور ڈپٹی اسپیکر کے انتخاب کیلئے پیپلز پارٹی سے ووٹ مانگ لیے۔ پی ٹی آئی کے وفد نے پیپلزپارٹی کے رہنما خورشید شاہ سے ملاقات کی جس میں ملکی سیاسی صورتحال سمیت کئی معاملات پر بات چیت ہوئی۔ملاقات کے بعد میڈیا سے گفتگو میں خورشید شاہ نے کہا کہ پی ٹی آئی کے وفد سے ملاقات ہوئی ہے، سب کو پارلیمنٹ میں آ کر کردار ادا کرنا چاہئے۔انہوں نے کہا کہ ملکی اور قومی مفاد کے لیے قانون سازی کی حمایت کریں گے۔

پی ٹی آئی ترجمان فواد چوہدری کا کہنا تھا کہ شہباز شریف، خورشید شاہ اور ایم کیو ایم کو تقریب حلف برداری میں شرکت کے دعوت نامے پہنچائے ہیں۔انہوں نے کہا کہ خورشید شاہ سے درخواست کی ہے کہ وہ اسد قیصر کے حق میں دستبردار ہو جائیں، پارلیمان کو مضبوط کرنے کی بات کی ہے۔انہوں نے کہاکہ ایاز صادق سے بھی اچھی گفتگو ہوئی ہے جس سے تعاون کا ایک نیا راستہ نکلے گا، انتخابات سے متعلق شکایات پر اپوزیشن جو تجاویز دے گی، ہم اسے آگے لیکر چلیں گے۔فواد چوہدری نے کہا کہ دنیا عمران خان کو عالمی سطح کے لیڈر کے طور پر دیکھ رہی ہے۔نجی ٹی وی سے گفتگو کرتے ہوئے انہوں نے کہا کہ خیبرپختونخوا میں پی ٹی آئی کی گزشتہ حکومت کے دوران کرپشن کا ایک کیس بھی سامنے نہیں آیا جو ہماری جماعت کی بہت بڑی کامیابی ہے۔ انہوں نے کہا کہ لوگوں کو یقین ہے کہ عمران خان عوام کا پیسہ صحیح خرچ کریں گے، اسی لیے عوام نے عمران خان کو کامیاب بھی کیا ہے، انہوں نے کہا کہ اداروں کا ڈھانچہ پروفیشنل اور بھرتیاں اقربا پروری سے بالاتر ہوں گی، ابھی تک گورنرز اور وزارت اعلیٰ کے امیدوار بھی میرٹ پر نامزد کیے گئے ہیں۔ فواد چوہدری کا کہنا تھا کہ ہم اپوزیشن کو ساتھ لیکر چلیں گے اور تقریب حلف برداری میں تمام جماعتوں کے پارلیمانی لیڈرز کو شرکت کی دعوت دیں گے۔