اسلام آباد(مانیٹرنگ ڈیسک) پنجاب کا وزیراعلیٰ کون؟عمران خان کے اعلان کے بعد کس رہنما کے گھر کی سکیورٹی بڑھا دی گئی۔ تفصیلات کے مطابق عمران خان نے خیبرپختونخواہ میں محمود خان کو وزارت اعلیٰ کیلئے نامزد کر دیا ہے تاہم پنجاب کے حوالے سے عمران خان کا کہنا تھا کہ وہ ایسےنو جوان کو پنجاب کی وزارت اعلیٰ کیلئے نامزد کرینگے جو کہ کلین ہو گا۔ عمران خان کے اعلان کے بعد مختلف نوجوان رہنمائوں کے حوالے سے صحافتی و سیاسی حلقوں میں پیش گوئیوں کا سلسلہ شروع ہو گیا تاہم اب نجی ٹی وی
کے معروف اینکر منصور علی خان نے انکشاف کیا ہے کہ عمران خان کے پنجاب کے وزیراعلیٰ کے اعلان کے بعد چکوال سےنو منتخب نوجوان ایم پی اے راجہ یاسر ہمایوں سرفراز کے گھر کی سکیورٹی بڑھا دی گئی ہے اور بھاری نفری نے ان کے گھر کی سکیورٹی کی ذمہ داری سنبھال لی ہے۔ اس حوالے سے راجہ یاسر ہمایوں سرفراز کا کہنا تھا کہ عمران خان کی جانب سے اگر انہیں پنجاب کی وزارت اعلیٰ کیلئے نامزد کیا جاتا ہے تو وہ اسے قبول کرینگے تاہم ابھی تک اس حوالے سے کوئی اشارہ انہیں نہیں ملا۔
