اسلام آباد (نیوز ڈیسک) بلوچستان میں ایندھن کی ممکنہ کمی کے پیش نظر صوبے بھر کے سرکاری اور نجی تعلیمی اداروں کو عارضی طور پر بند کرنے کا فیصلہ کیا گیا ہے۔

میڈیا رپورٹس کے مطابق صوبائی حکام نے اس حوالے سے باضابطہ اعلامیہ جاری کر دیا ہے جس کے تحت بلوچستان کے تمام اسکولوں اور کالجوں میں تدریسی سرگرمیاں معطل رہیں گی۔اعلامیے کے مطابق تعلیمی ادارے آج سے 23 مارچ تک بند رہیں گے۔ حکام کا کہنا ہے کہ خطے میں موجودہ کشیدہ صورتحال اور اس کے ممکنہ اثرات کو مدنظر رکھتے ہوئے یہ قدم اٹھایا گیا ہے۔ اس اقدام کا مقصد ملک میں ایندھن کی بچت کو یقینی بنانا بھی ہے۔یاد رہے کہ ایران، اسرائیل اور امریکا کے درمیان بڑھتی ہوئی کشیدگی کے باعث پاکستان میں ایندھن کے ذخائر محدود ہو کر تقریباً 28 دن تک رہ گئے ہیں۔

اسی تناظر میں حالیہ دنوں میں پیٹرول کی قیمت میں 55 روپے فی لیٹر اضافہ بھی کیا گیا، جس کے بعد ملک میں پیٹرول کی قیمت 321 روپے فی لیٹر سے زیادہ ہو گئی ہے۔