اسلام آباد (مانیٹرنگ ڈیسک )محمود خان کو ان کی اعلیٰ کارکردگی اور مالاکنڈ ڈویژن میں پی ٹی آئی کے کلین سویپ میں اہم کردار ادا کرنے پر عمران خان نے خیبرپختونخواہ کی وزارت اعلیٰ کیلئے نامزد کیا ، حامد میر نے محمود خان کی پرویز خٹک گروپ سے وابستگی اور عاطف خان گروپ سے لڑائی کی خبروں کی تردید کر دی۔ تفصیلات کے مطابق نجی ٹی وی پروگرام میں گفتگو کرتے ہوئے معروف صحافی حامد میر نے تحریک انصاف کی جانب سے نامزد وزیر اعلیٰ خیبرپختونخواہ محمود خان کی پرویز خٹک گروپ سے وابستگی اور عاطف خان گروپ سے لڑائی کی

خبروں کی تردید کرتے ہوئےکہا ہے کہ عمران خان نے پارٹی کیلئے ان کی خدمات اور کام کو دیکھتے ہوئے انہیں وزیراعلیٰ خیبرپختونخواہ نامزد کیا ہے۔ اس حوالے سے حامد میر کا کہنا تھا کہ عمران خان نے بطورصوبائی وزیر کھیل محمود خان کی کارکردگی کا خود جائزہ لیا جو کہ انتہائی شاندار ہے جبکہ محمود خان کی خیبرپختونخواہ میں سیاحت کے فروغ کیلئے خدمات بھی بہترین ہیں۔ حامد میر کا مزید کہنا تھا کہ الیکشن 2013میں تحریک انصاف کو سوات سے صرف ایک قومی اور ایک صوبائی اسمبلی کی سیٹ ہاتھ لگی تھی ، قومی اسمبلی کی سیٹ پر مراد سعید اور صوبائی پر محمود خان جیتے تھے بعد میں محمود خان کو پی ٹی آئی مالاکنڈ ڈویژن کا صدر بنا دیا گیا اور فاٹا انضمام کے بعد باجوڑ کا علاقہ بھی انہیں دیا گیا جہاں انہوں نے کام کیا اور عام انتخابات 2018میں سوات سے نہ صرف تحریک انصاف نے کلین سویپ کیا بلکہ باجوڑ کی بھی دونوں سیٹیں جیتیں۔ ان کا کہنا تھا کہ خیبرپختونخواہ میں سب سے بہترین کارکردگی محمود خان کی رہی ہے اور عام انتخابات میں انکی کارکردگی سب سے اچھی رہی اور یہی وجہ ہے کہ عمران خان نے محمود خان کو وزارت اعلیٰ خیبرپختونخواہ کیلئے نامزد کیا ہے۔