اسلام آباد (مانیٹرنگ ڈیسک) شہباز شریف کے مبینہ ساتھی عابد باکسر کے بعد رانا ثنا اللہ کے مبینہ فرنٹ مین تھانیدار کی منظر نامے میں انٹری، ملک سے فرار رانا فرخ وحید کے خلاف گھیرا تنگ ، پاکستان واپس لانے کا فیصلہ۔ تفصیلات کے مطابق شہباز شریف کے مبینہ ساتھی سابق انسپکٹر عابد باکسر کے بعد رانا ثنا اللہ کے مبینہ فرنٹ مین تھانیدار رانا فرخ وحید کی منظرنامہ میں انٹری ہو ئی ہے

اور رانا فرخ وحید کے گرد گھیرا تنگ کرتے ہوئے اسے پاکستان واپس لانے کا فیصلہ کر لیا گیا ہے جبکہ اس حوالے سے تمام قانونی تقاضے پورے کر لئے گئے ہیں۔ میڈیا رپورٹس کے مطابق رانا فرخ وحید مبینہ طور پر رانا ثنا اللہ کا فرنٹ مین ہے اور اس کی فیصل آباد شہر کے مختلف تھانوں میں رانا ثناء اللہ کے کہنے پر ہی تعیناتی ہوتی رہی، تھانے میں تعیناتی کسی خاص ٹارگٹ کے ساتھ ہوتی تھی۔رانا فرخ وحید شہر میں جعلی مقابلوں کے لیے مشہور تھے۔رانا فرخ پر فیصل آباد میں 2 بھائیوں سمیت 22 افراد کو جعلی پولیس مقابلوں میں قتل کرنے کا الزام عائد ہے۔رپورٹس کے مطابق فیصل آباد کے سب انسپکٹر فرخ وحید نے پچھلے دو سال میں 26 قریب لوگوں کو قتل کیا۔اور ان تمام لوگوں کو جعلی پولیس مقابلوں میں قتل کیا گیا۔رپورٹس میں یہ بھی انکشاف کیا گیا ہےکہ قتل ہونے والے ان افراد کی سابق وزیر قانون پنجاب رانا ثناء اللہ سے کسی نہ کسی طریقے سے دشمنی تھی۔ اس حوالے سے انکشافات ن لیگ کے مرکزی رہنما چوہدری شیر علی کی طرف سے سامنے آچکے ہیں۔چوہدری شیر علی جو کہ سابق وفاقی وزیر عابد شیر علی کے والد ہیں کا کہنا ہے کہ رانا ثناء اللہ نے تھانیدار فرخ وحید کےذریعے مخالفین کو قتل کروایا۔ یہ تمام قتل کرنے کے بعد فرخ وحید بیرون ملک فرار ہو گیا تھا اور کہا جا رہا ہے کہ آج کل فرخ وحید انگلینڈ میں ہیں ۔

موضوعات:رانا ثنا اللہ رانا فرخ وحید شہباز شریف عابد باکسر