اسلام آباد(مانیٹرنگ ڈیسک)سابق وزیراعظم نواز شریف کے داماد کیپٹن صفدر کی اڈیالہ جیل میں موجیں،جیل میں اے کیٹگری مل گئی، بستر، ٹی وی ، اخبار ، اے سی اور پنکھے کی سہولت میسر، چار مشقتی بھی دے دئیے گئے۔ تفصیلات کے مطابق سابق وزیراعظم نواز شریف کے داماد کیپٹن صفدر کو اڈیالہ جیل میں اے کیٹگری دی گئی ہے ۔ کیپٹن صفدر جیسے ہی اڈیالہ جیل پہنچے تو ڈاکٹرز کی ٹیم نے ان کا طبی معائنہ کرنے کے بعد انہیں کلیئر قرار دیا جس کے بعد انہیں ان کیلئے مخصوص اے کیٹگری کے کمپائونڈ میں منتقل کر دیا گیا ہے۔
“اے”کلاس کیٹگری میں کیپٹن(ر)صفدرکو بستر ،ٹی وی اور اخبار کی سہولیات بھی میسر ہوں گی جبکہ انہیں ایک کمپاؤنڈ میں رکھا جائے گا جہاں اے سی اور پنکھا بھی دستیاب ہو گا اور انہیں چار مشقتی بھی دیئے گئے ہیں ۔ان کا کمپاؤنڈ دیگر قیدیوں سے کافی فاصلے پر ہے اور عام قیدیوں کے اس جگہ آنے پر پابندی عائد ہے ۔ کیپٹن صفدر کی کمپاؤنڈ میں منتقلی کے بعد سیکیورٹی کو بھی مزید سخت کر دیا گیا۔واضح رہے کہ اس سے قبل سابق صدر آصف علی زرداری سمیت دیگر سیاسی رہنمائوں کو اڈیالہ جیل میں اے کیٹگری دی جا چکی ہے۔
