اسلام آباد (نیوز ڈیسک) اسلام آباد کی احتساب عدالت کی جانب سے ایون فیلڈ ریفرنس میں سابق وزیر اعظم نواز شریف، ان کی صاحبزادی مریم نواز اور داماد کیپٹن (ر) صفدر کو سزائیں سنانے پر رد عمل دیتے ہوئے سینئر وکیل اور سابق اٹارنی جنرل عرفان قادر نے کہا ہے کہ اس فیصلے پر 10 دن میں اپیل کرسکتے ہیں۔ایک انٹرویو میں انہوں نے کہاکہ نواز شریف کو اگر وطن واپسی پر گرفتار کرنا چاہیں تو کیا جاسکتا ہے لیکن اگر وہ واپس نہیں آئے تو انہیں دیگر طریقوں سے بلانے کی کوشش کی جائے گی۔ انہوں نے عدالت کی جانب سے فیصلے کو مسلسل مؤخر کرنے پر کہا کہ

یہ عمل انتہائی غیر معمولی تھا، اس کے علاوہ سپریم کورٹ کی جانب سے نیب کو ریفرنس دائر کرنے کا کہنا بھی غیر معمولی تھا۔انہوں نے کہاکہ یہ فیصلہ بہت تنازعات کا شکار ہوا اور اس پر تنازع کھڑا ہوگا کیونکہ اس کیس میں نواز شریف کے وکلاء کی جانب سے بھی اس طرح کے دلائل نہیں دیے گئے جو دینے چاہیے تھے۔انہوں نے کہا کہ اس ریفرنس کے دوران سارا عمل قانون اور آئین سے مبرہ تھا اور یہ فیصلہ تنازع کا شکار ہوا ہے۔ایک سوال کے جواب میں انہوں نے کہا کہ یہ کہنا نواز شریف کے وکلاء کمزور تھے یہ بات غلط ہے اور میں اسے ماننے کو تیار نہیں۔