اسلام آباد (این این آئی) اسلام آبا د کی احتساب عدالت نے پاکستان مسلم لیگ (ن)کے تاحیات قائد ٗ سابق وزیراعظم نواز شریف اور ان کی صاحبزادی مریم نواز کی جانب سے ایون فیلڈ ریفرنس کا فیصلہ موخر کرنے کی درخواست مسترد کرتے ہوئے جمعہ کو ہی فیصلہ سنانے کا اعلان کیا بعدازاں کہا گیا ہے کہ فیصلہ اڑھائی بجے سنایا جائے گا۔ جمعہ کو سابق وزیراعظم نواز شریف اور ان کی صاحبزادی مریم نواز لندن میں موجودگی کی وجہ سے عدالت میں پیش نہیں ہوئے ٗ

نواز شریف کے داماد کیپٹن (ر) محمد صفدر مانسہرہ میں موجودگی کی وجہ سے عدالت نہیں آئے جہاں وہ اپنی انتخابی مہم چلاتے رہے ۔صبح 9 بجکر 40 منٹ پر جب سماعت کا آغاز ہوا تو سابق وزیراعظم نواز شریف کی لندن میں زیر علاج اہلیہ کلثوم نواز کی تازہ میڈیکل رپورٹ عدالت میں پیش کی گئی۔مریم نواز اور کیپٹن (ر) صفدر کے وکیل امجد پرویز نے عدالت کو بتایا کہ بیگم کلثوم نواز کی حالت تشویشناک ہے اور ڈاکٹرز کے مطابق آئندہ 48 گھنٹے فیملی کا کلثوم نواز کے ساتھ ہونا ضروری ہے، لہذا فیصلے کو کچھ دن کیلئے موخر کردیا جائے تاہم نیب کے ڈپٹی پراسیکیوٹر جنرل سردار مظفر عباسی نے فیصلہ موخر کرنے کی درخواست کی مخالفت کردی۔ جس کے بعد جج محمد بشیر نے ایون فیلڈ ریفرنس کا فیصلہ موخر کرنے کی درخواست پر فیصلہ محفوظ کرتے ہوئے سماعت11 بجے تک کیلئے موخر کردی۔بعدازاں عدالت نے نواز شریف اور مریم نواز کی درخواست مسترد کرتے ہوئے کہا کہ ایون فیلڈ ریفرنس کا فیصلہ ساڑھے 12 بجے سنانے کااعلان کیا بعدازاں ساڑھے بارہ عدالتی عملے کی جانب سے بتایا گیا کہ فیصلہ اڑھائی بجے سنایا جائیگا۔ نواز شریف ایون فیلڈ ریفرنس (لندن فلیٹس)کا فیصلہ ایون فیلڈ فلیٹس(لندن فلیٹس)میں بیٹھ کر سنیں گے۔ نواز شریف کے ساتھ ان کی صاحبزادی مریم نواز اور دونوں صاحبزادے حسن اور حسین نواز کے علاوہ قریبی عزیز ، لندن میں موجود پارٹی رہنما موجود ہونگے۔ واضح رہے کہ اسلام آباد کی احتساب عدالت نے 3 جولائی کو شریف خاندان کے خلاف ایون فیلڈ ریفرنس کا فیصلہ محفوظ کیا تھا جسے سنانے کیلئے 6 جولائی کی تاریخ مقرر کی گئی

تاہم گزشتہ روز نواز شریف نے اپنے وکیل خواجہ حارث کے معاون وکیل ظافر خان کے توسط سے ایون فیلڈ ریفرنس کا فیصلہ مؤخر کرنے کیلئے باضابطہ درخواست دائر کی۔درخواست میں مؤقف اپنایا گیا تھا کہ وہ اس ٹرائل کا حصہ رہے ہیں اور مسلسل عدالت آتے رہے تاہم اچانک صورتحال تبدیل ہوئی اور ان کی اہلیہ کلثوم نواز کی طبیعت شدید خراب ہوگئی۔درخواست میں کہا گیا کہ ڈاکٹرز نے کلثوم نواز کی طبیعت میں بہتری تک واپس نہ جانے کا مشورہ دیا ہے۔نواز شریف کی درخواست میں استدعا کی گئی تھی کہ مجبوری کے باعث وہ 6 جولائی کو پاکستان نہیں آسکتے ٗ جیسے ہی ان کی اہلیہ کی طبیعت بہتر ہوگی وہ پاکستان آئیں گے، لہٰذا کچھ دن کے لیے فیصلہ مؤخر کیا جائے۔