اسلام آباد(مانیٹرنگ ڈیسک)آئی جیز سے کہیں عدالت آجائیں،چاہے جہاز پر آئیں یا ہیلی کاپٹر پر، چیف جسٹس ثاقب نثار نے چاروں صوبوں کے آئی جیز کو جمعےکو طلب کر لیا۔ تفصیلات کے مطابق سپریم کورٹ آف پاکستان میں چیف جسٹس کی سربراہی میں بنچ نے سرکاری رہائش گاہوں پر قبضے سے متعلق کیس کی سماعت کی ۔ اس موقع پر ایڈیشنل اٹارنی جنرل عدالت میں پیش ہوئے۔ ایڈیشنل اٹارنی جنرل نے عدالت کو بتایا کہ سرکاری رہائش گاہوں سے متعلق آئی جیز تعاون نہیں کر رہے اور صرف اسلام آباد
میں 200 سرکاری رہائشگاہوں پر پولیس والے قابض ہیں اور کراچی میں بھی اسی قسم کی صورتحال ہے۔جس پر چیف جسٹس نے استفسار کیا کہ آئی جیز کیوں تعاون نہیں کر رہے، کیا ان کو بلا لیں؟، آئی جیز سے کہیں عدالت آجائیں چاہے جہاز پر آئیں یا ہیلی کاپٹر پر۔ ایڈیشنل اٹارنی جنرل بولے ابھی یہ ممکن نہیں جمعہ تک کا وقت دیا جائے۔چیف جسٹس پاکستان میاں ثاقب نثار نے جمعے تک کیس کی سماعت ملتوی کرتے ہوئے ریماکس دیئے کہ جمعے کو تمام صوبوں کے آئی جیز پیش ہوں۔
