لاہور(این این آئی)گزشتہ پانچ برس کے دوران ملک بھرمیں غیرمسلم ووٹرزکی تعداد میں 30فیصد اضافہ ہوا ۔الیکشن کمیشن کے اعداد و شمار کے مطابق پاکستان میں رجسٹرڈ غیرمسلم ووٹروں کی تعداد 36 لاکھ 31 ہزار471 ہے ۔ مجموعی طور پرسات بڑی غیرمسلم اقلیتوں کو رجسٹرڈ کیا گیا ہے ان میں سب سے زیادہ ہندو ووٹرزہیں جن کی تعداد 17 لاکھ 77 ہزار 347 ہے،

ہندو برادری کی زیادہ آبادی سندھ میں ہی آباد ہے، غیر مسلم رجسٹرڈ ووٹروں میں مسیحی برادری دوسرے نمبرہے جن کی تعداد 16 لاکھ 40 ہزار 105 ہے، تیسرے نمبر پر قادیانی ووٹر زہیں جن کی تعداد ایک لاکھ 67 ہزار 505 ہے ، اسی طرح بہائیوں کی تعداد 31 ہزار 543 ہے۔پاکستان میں رجسٹرڈ سکھ ووٹرز کی تعداد 8 ہزار 852، پارسی 4 ہزار235 اور بدھ مت رجسٹرڈ ووٹرزکی تعداد ایک ہزار 884 ہے، 2013ء کی انتخابی فہرستوں میں رجسٹرڈ یہودی ووٹروں کی تعداد 809 تھی یہ تعدادالگ سے لکھنے کی بجائے دیگر چھوٹی اقلیتوں کے ساتھ شامل کردی گئی ہے۔انتخابی فہرستوں کے مطابق ہندو ووٹروں کی اکثریت سندھ میں رہتی ہے جہاں 40 فیصد ووٹر صرف دو اضلاع عمر کوٹ اور تھرپاکر میں رہتے ہیں، اسی طرح مسیحی ووٹروں کی بڑی تعداد پنجاب میں آباد ہے جبکہ سندھ کے مختلف اضلا ع بالخصوص کراچی میں دو لاکھ سے زیادہ مسیحی ووٹر موجود ہیں۔ قادیانی ووٹر پنجاب، سندھ اور وفاقی دارالحکومت اسلام آباد میں رہتے ہیں جبکہ سکھ ووٹروں کی بہت بڑی تعداد خیبر پختونخوا ہ اور فاٹا کے قبائلی علاقوں میں مقیم ہے۔ لاہور اور ننکانہ صاحب میں بھی سکھوں کی بڑی تعدادمقیم ہے، پارسی ووٹرز کی بڑی اکثریت سندھ میں ہے جبکہ ان کا ایک حصہ خیبر پختونخوا ہ میں بھی آباد ہے جب کہ یہودیوں کی زیادہ ترخاندان بھی کراچی میں ہی مقیم ہیں۔