اسلام آباد(سی پی پی ) وفاقی تحقیقاتی ادارہ ( ایف آئی اے) نے عوام الناس کو متنبہ کیا ہے کہ ٹیلی فون پر کسی بھی اجنبی شخص کو اپنی ذاتی معلومات، بینک کھاتوں اور شناختی کارڈ نمبرکی معلومات فراہم نہ کریں، چند دھوکہ باز خود کو حساس اداروں کے اہلکار اور بینک ملازمین کے نام سے متعارف کروا کر ذاتی معلومات حاصل کرتے ہیں۔

ایف آئی اے حکام کی طرف سے جاری عوامی آگاہی نوٹس میں کہا گیا ہےکہ ایف آئی اے اس ضمن میں پہلے ہی قانونی کارروائیوں کا آغاز کر چکی ہے لہٰذاایسے کسی بھی نامعلوم شخص کو اپنی ذاتی معلومات دینے سے گریز کریں۔ اس ضمن میں کسی بھی قسم کی معلومات یا شکایات کی صورت میں ایڈیشنل ڈائریکٹر ایف آئی اے کمرشل بینک سرکل کراچی کو فون نمبر 021۔99206345 اور ڈپٹی ڈائریکٹر ایف آئی اے کمپلینٹ کے فون نمبر 021۔99206116 پر اطلاع دی جا سکتی ہے۔