کراچی (مانیٹرنگ ڈیسک) تحریک انصاف وومن ونگ سندھ کی صدر نصرت واحد نے کہا ہے کہ نوازشریف کی ملک سے فرار کی کوشش ناکام بنادی جائیں۔ عدالتوں میں زیرِ سماعت مقدمات کے فیصلے تک نوازشریف اور مریم نوازکا نام ای سی ایل میں شامل کیا جائے۔
وفاقی وزیر داخلہ احسن اقبال نے سابق وزیر اعظم اور ان کی صاحبزادی کا نام ایگزٹ کنٹرول لسٹ میں ڈالنے کے بجائے معاملہ کابینہ کمیٹی کو بھیج دیا ہے جس کے باعث اب تک اس معاملے میں کوئی پیش رفت نہیں ہوسکی ہے۔ ان خیالات کا اظہار انہوں نے رکن سازی کیمپ کے دورے کے موقع پر کارکنوں سے گفتگو کرتے ہوئے کیا۔ انہوں نے مزید کہا کہ اس بار نوازشریف کے ساتھ این آر او ہونا ناممکن ہے۔ نوازشریف اور ان کے ٹبر کو جیل روانہ کیا جائے گا۔ عدالتوں میں زیرِ سماعت مقدمات میں سزاؤں کے ڈر سے نوازشریف نے اپنا ٹریک تبدیل کرلیا ہے اور وہ کل تک عدلیہ اور افواج پاکستان کو تنقید کا نشانہ بناتے تھے۔ اب اداروں سے گفت و شنید چاہتے ہیں۔ انہوں نے کہا کہ ملک سے لوٹی ہوئی دولت بیرون ملک سے واپس لانے کا وقت قریب آچکا ہے۔ قوم کرپشن کے باعث الیکشن میں پاکستان مسلم لیگ(ن) کو مسترد کردیں گے۔ نصرت واحد نے مزید کہا کہ چیئرمین عمران خان ہی پاکستان میں واحد سیاسی رہنما ہیں جو ملک کو مسائل کی گرداب سے باہر نکال سکتے ہیں۔ عام انتخابات میں عوام تحریک انصاف کو کامیاب بنائیں گے۔
