اسلام آباد (مانیٹرنگ ڈیسک) سپریم کورٹ کے جج جسٹس گلزار احمد کے بیٹے کی گاڑی پر کراچی میں فائرنگ ، مسلح موٹر سائیکل سوار تین ملزمان فائرنگ کے بعد فرار۔ تفصیلات کے مطابق سپریم کورٹ جج جسٹس گلزار احمد کے بیٹے سعد کی گاڑی پر کراچی میں نامعلوم تین مسلح موٹر سائیکل سوار ملزمان نے فائرنگ کی ہے ۔ سعد گلزار احمد فائرنگ کے واقعہ میں محفوظ رہے ہیں جبکہ ملزمان فائرنگ کے بعد فرار ہوگئے۔ بتایا جاتا ہے کہ جسٹس گلزار احمد ان دنوں کراچی رجسٹری

میں شہر میں لینڈ مافیا کے خلاف اہم کیسز کی سماعت کر رہے ہیں تاہم ابھی تک یہ تصدیق نہیں ہو سکی کہ فائرنگ کرنے والے ملزمان کون تھے ۔کراچی پولیس کے ترجمان کے مطابق سعد گلزار احمد صبح اپنے دفتر جا رہے تھے کہ راستے میں 3مسلح افراد نے سعد گلزار کی گاڑی کو اسلحہ دکھا کر روکنے کی کوشش کی تاہم سعد گلزار کے گارڈ نے بروقت فائرنگ کی جس پر مسلح افراد گاڑی پر فائرنگ کرتے ہوئے موٹر سائیکل پر فرار ہو گئے۔ پولیس ہر زاوئیے سے وقوعہ کی تفتیش کر رہی ہے۔