کراچی،اسلام آباد(سی پی پی )محکمہ موسمیات نے آئندہ ہفتے شہر اور گرد و نواح میں شدید سردی کی پیش گوئی کردی ۔ کراچی سمیت سندھ اوربلوچستان کے ساحلی علاقوں میں ایک مرتبہ پھرسردی کی شدت میں اضافہ ہوا ، گزشتہ 24 گھنٹے کے دوران شہرمیں کم سے کم درجہ حرارت 13 ڈگری سینٹی گریڈ ریکارڈ کیا گیا ہے تاہم آئندہ چند روزمیں سردی کی شدت مزید بڑھنے کا امکان ہے۔ محکمہ موسمیات کے

ریجنل ڈائریکٹر شاہد عباس کا کہنا ہے کہ 8 جنوری کو کوئٹہ کی سرد ہوائیں شمال مشرقی سمت سے کراچی میں داخل ہوں گی جس سے درجہ حرارت میں کئی ڈگری کمی اور سردی کی شدت میں نمایاں اضافے کا امکان ہے، شہر میں سرد اور خشک ہواؤں کی وجہ سے سردی کا سلسلہ کئی روز تک جاری رہ سکتا ہے۔ دریں اثنا کے بیشتر علاقوں میں موسم سرد اور خشک رہے گا۔ پنجاب کے میدانی علاقوں اور بالائی سندھ میں رات اور

صبح کے اوقات میں شدید دھند پڑنے کا امکان ہے۔ راولپنڈی اسلام آباد میں کم سے کم درجہ حرارت 4 جبکہ زیادہ سے زیادہ 18 ڈگری سینٹی گریڈ رہنے کا امکان ہے۔ محکمہ موسمیات کے مطابق پنجاب کے میدانی علاقوں اور بالائی سندھ میں رات اور صبح کے اوقات میں شدید دھند پڑے گی۔ گزشتہ روز مالاکنڈ، ہزارہ، راولپنڈی ڈویژن اور

گلگت بلتستان میں چند مقامات پر بارش اور پہاڑوں پر برفباری ہوئی، مالم جبہ میں 11 ملی میٹر بارش جبکہ 5 انچ برف باری ریکارڈ کی گئی۔ سب سے زیادہ سردی سکردو میں پڑی جہاں پارہ منفی 8 ڈگری سینٹی گریڈ تک گر گیا، قلات، گوپس، کوئٹہ میں درجہ حرارت منفی 07، پارہ چنار اور استور میں منفی 05 ڈگری سینٹی گریڈ ریکارڈ کیا گیا۔